गोडाले घाँटी थिचेर सुत्केरी श्रीमतीको हत्या
गत शुक्रबार राति आफ्नै घरको कोठामा झुण्डिएर मृत्यु भएकी भनिएकी जिल्लाको बाँफिकोट गाउँपालिकाकी एक महिलाको हत्या भएको रहस्य खुलेको छ । बाँफिकोट गाउँपलिका ९,निवासी २६ वर्षीया कमला खनाललाई उनकै श्रीमानले कर्तव्य गरेर मारेको प्रहरीले जनाएको छ ।
जिल्ला प्रहरी कार्यालय रुकुम पश्चिमका निरीक्षक डेकेन्द्र शर्माका अनुसार प्रारम्भिक अनुसन्धानबाट कमलाका श्रीमान दिपक खनाल भन्ने दलजित खनालले घाँटी थिचेर हत्या गरेको खुल्न आएको छ । रक्सी सेवन गरेका उनले गोडाले घाँटीमा टेकेर श्रीमतीलाई मारेपछि उनकै बर्को (सल) तानेर झुण्डाइदिएका थिए ।
शुक्रबार राति १० बजे दिपकले श्रीमतीको हत्या गरेपछि परिवारका अन्य सदस्यहरुलाई कमलाले आत्महत्या गरेको बताएका थिए ।
उनीहरु खाना खाएर सुत्न गएका र परिवारका अन्य सदस्य भान्सामै रहेको बेला उक्त घटना भएको थियो । दम्पती एउटै कोठामा रहेको बेला श्रीमती कसरी झुण्डिएर मरिन् भन्ने आशंकामा परिवारका सदस्यले त्यतिबेलै दिपकप्रति शंका गरेका थिए । उनीहरुको चार महिनाको छोरीसमेत छ ।
प्रहरी निरीक्षक शर्माको नेतृत्वमा खटिएको अनुसन्धान टोलीले दिपकलाई नियन्त्रणमा लिएर घटनाको अनुसन्धान थालेको छ ।
पक्राउ परेका दिपकलाई जिल्ला अदालत रुकुमबाट १० दिनको म्याद लिएर घटनाको थप अनुसन्धान गरिएको बताइएको छ । पोष्टमार्टम रिपोर्टपछि घटनाबारे थप स्पष्ट हुने प्रहरी निरीक्षक शर्माले बताउनुभयो । बयानका क्रममा दिपकले हत्या गरेको स्वीकारेका छन् ।
टिप्पणीहरू