माधव नेपाललाई मनाउन गृहमन्त्री कोटेश्वरमा, प्रचण्ड बालुवाटार पुग्नुभो

एमसीसी सम्झौताका कारण पाँच दलीय गठबन्धनमा दरार आएको भनिएका बेला नेकपा एकीकृत समाजवादीका अध्यक्ष माधवकुमार नेपाललाई भेट्न गृहमन्त्री बालकृष्ण खाँण कोटेश्वर पुग्नुभएको छ । नेपाल निवास कोटेश्वर पुगेर गृहमन्त्री खाँणले पौने घण्टा छलफल गर्नुभएको बताइएको छ ।

संसदबाट एमसीसी अनुमोदन गर्नेबारे सत्ता गठबन्धनका प्रमुख तीन दल काँग्रेस, माओवादी केन्द्र र एकीकृत समाजवादीबीच विवाद देखिएको छ । काँग्रेस कुनै पनि हालतमा एमसीसी पास गर्नुपर्ने पक्षमा छ भने माओवादी र समाजवादी संशोधन गरेर मात्र स्वीकार गर्नुपर्ने अडानमा छन् । गठबन्धनमा सहमति जुट्न नसकेपछि पछिल्लो समय प्रधानमन्त्री देउवा एमालेको साथ लिएर एमसीसी पास गर्ने तयारीमा लागेको चर्चासमेत चलिरहेको छ ।

एमसीसीका कारण सत्ता गठबन्धनमा विवाद बढेको भनिएका बेला नेपाललाई भेट्न गृहमन्त्री कोटेश्वर पुग्नुलाई चासोका साथ हेरिएको छ । तर, अध्यक्ष नेपालका स्वकीय सचिव मोहन गौतमले भने भेटमा खास विषयमाथि कुराकानी नभएको बताएका छन् । उनले भने, ‘यो नियमित भेटघाट हो । खास विषय केही थिएन ।’

यता, आगामी जेठ ४ गते स्थानीय तहको निर्वाचन मिति तोक्ने प्रधानमन्त्रीको तयारीप्रति पनि अध्यक्ष नेपाल सन्तुष्ट नरहेको बताइन्छ ।

यसैबीच माओवादी केन्द्रका अध्यक्ष पुष्पकमल दाहाल प्रचण्ड पनि बालुवाटार पुग्नुभएको छ । प्रधानमन्त्रीलाई भेटेर एमसीसी र निर्वाचनबारे छलफल गर्न उहाँ बालुवाटार जानुभएको बताइएको छ ।