मोरङ र ललितपुरमा भेटिएका शव ५ फिट मुनि किन गाडियो ?

मोरङको धनपालथान गाउँपालिकास्थित बोर्डिङ टोल र ललितपुरको गोदावरी नजिकैको ठेचोमा तीन जना व्यवसायीको हत्या कनेक्सन बाहिरिएपछि गिरोहका पाँच जना सदस्य फरार भएका छन् ।

उनीहरुलाई खोज्न मोरङ प्रहरीको टोली लागिपरेको छ । यद्यपी अस्ति पक्राउ परेका मुख्य योजनाकारसहित गिरोहका तीन जनालाई प्रारम्भिक अनुसन्धान प्रतिवेदनसहित मोरङ प्रहरीले हिजो सार्वजनिक गरेको छ ।

हत्या घटनाको अनुसन्धान टुंगोमा पुर्याउन प्रहरीले चार वटा छुट्टाछुट्टै टोली गठन गरेर अनुसन्धान थालेको थियो । ठेचोस्थित प्रदिपकुमार थापाको घर छेउमा खाल्डो खनेर गाडिएका तेह्रथुमको संक्रान्ति गाउँपालिका २ का ६३ वर्षीय मोहन लिम्बुको शव बिहीबार फेला पारेको हो । उनको मंसिर २८ गते हत्या गरिएर गाडिएको थियो ।

लिम्बुको र मोरङको उखुबारीमा गत माघ १२ र १३ गते फेला परेको सुनसरी धरान उपमहानगरपलिका ३ का ४८ वर्षीय राजेन्द्रकुमार श्रेष्ठ र सप्तरी शम्भुनाथ नगरपालिका ४ का शम्भु चौधरीको हत्याको ‘कनेक्सन’ एउटै रहेको प्रहरीले दाबी गरेको छ ।

ललितपुर र मोरङका घटनामा हत्या गर्ने र शव गाड्ने तरिका एउटै भएको र काठमाण्डौंबाट एक जना पक्राउ परेको सूचना बाहिरिएपछि तीन जना व्यवसायीको हत्यामा संलग्न गिरोहका पाँच जना सदस्यहरु एकाएक फरार भएका हुन् । अनुसन्धानमा संलग्न एक प्रहरीका अनुसार उक्त घटनाको कनेक्सन एउटै भएको सूचना नबाहिरिएको भए सम्भवतः हत्यामा संलग्न गिरोहका सबै सदस्य शुक्रबार बिहानै पक्राउ परिसक्ने थिए ।सूचना बाहिरिएपछि बिराटनगर आसपासमै रहेका पाँच जना सदस्यलाई प्रहरीले जानकारीमा लिइसकेको थियो । तर बल्खुबाट पक्राउ गरेका हत्याका मुख्य योजनाकार सिराहा नगरपालिका स्थायी घर भएका ३१ वर्षीय अनिलकुमार मण्डललाई नै प्रयोग गरेर बिहीबार राति सबैलाई पक्राउ गर्ने र भोलि वा पर्सि मात्र प्रारम्भिक अनुसन्धान सार्वजनिक गर्ने मोरङ प्रहरीको योजना रहेको बताइन्छ ।

गिरोहका सदस्यलाई पक्राउ गर्न काठमाडौंमा पक्राउ परेका मुख्य योजनाकार मण्डललाई बिहीबार राति नै प्रहरीले मोरङ पुर्याएको थियो । तर सूचना बाहिरिएकाले त्यतिञ्जेलसम्म सबै ‘हाइड’ भइसकेका थिए । प्रहरीले कसैको पनि पत्तो पाउन सकेन । फरार रहेका गिरोहका सदस्यहरुमा केही भारतीय नागरिक समेत रहेको बताइन्छ ।

हत्या गर्न पाँच लाखको सुपारी

ललितपुर र मोरङमा हत्या गरिएका तीन जना र पक्राउ परेका अनिलकुमार मण्डल कारोबारमा साझेदार रहेको खुलेको छ । उनीहरुबीच नाफा बाँडफाँटमा विवाद देखियो । उनीहरु सबैजना वैध तथा अवैध कारोबारमा सहभागी भएको पुष्टि भएको छ । सोही कारण मण्डलले नाफा एक्लौटी बनाउन साभेदारहरुको हत्या गर्ने योजना बनाएको प्रहरीले बताएको छ ।

उनले आफनो योजनाअनुसार भारतीयहरु समेत संलग्न रहेको किलरहरुको गिरोहलाई जनही पाँच लाख रुपैयाँ सुपारी कबोलेर दुई लाख रुपैयाँका दरले पेश्की समेत दिएका थिए । त्यसपछि योजनाअनुसार पालैपालो तीन जनाको ‘प्लान मर्डर’ गराएको रहस्य खुलेको छ ।

मोरङ प्रहरीको प्रारम्भिक अनुसन्धानअनुसार ललितपुर र मोरङमा फेला परेका तीनै जना व्यवसायीको हत्या किलरहरुले डोरी र गम्छाले घाँटी कसेर गरेको बताइएको छ । त्यसपछि गोलो इनारझैँ गहिरो खाल्डो खनेर नुन हालेर शवलाई गाडिदिएका थिए ।

पहिले लिम्बु, त्यसपछि राजेन्द्र अनि शम्भुको हत्या

हत्या योजनाअनुसार पहिले मंसिर २८ गते काठमाडौंको गोठाटार बस्दै आएका तेह्रथुमका मोहन लिम्बुको हत्या गरिएको थियो । लिम्बुवलाई मण्डलले प्रयोग गर्दै आएको ठेचोस्थित भाडाको घर परिसरमा गाडिएको अवस्थामा फेला पारिएको हो ।

त्यसपछि मंसिर २९ गते कारोबारका लागि भन्दै योजनाकार मण्डलले साझेदार शम्भु चौधरी र राजेन्द्र श्रेष्ठलाई बिराटनगर बोलाएका थिए । बिराटनगरमा उनीहरु बसपार्कस्थित होटलमा बसेका थिए । त्यसपछि पुस ५ गते राजेन्द्र श्रेष्ठलाई अहपरण गरि विराटनगरदेखि १५ किलोमिटर पूर्व र ५ किलोमिटर जति दक्षिणमा रहेको नेपालभारत सीमाबाट चार किलोमिटर उत्तरमा रहेको धनपालथान गाउँपालिका ७ मा रहेको उखुबारीमा लगेर हत्या गरि शव गाडेका हुन् ।

त्यसको दुई दिनपछि पुस ७ गते अर्का साझेदार शम्भुलाई पनि सोही ठाउँमा लगेर उस्तै तरिकाले हत्या गरि ३० मिटरको फरकमा गाडिदिएका थिए । नाफा भाग लगाउनुपर्ने सबै साझेदारहरुको हत्यापछि योजनाकार मण्डल काठमाडौ फर्किएका थिए ।

सुरुमा अपराधको कुनै कनेक्सन फेला पार्न नसकेको प्रहरीले आफन्तबाट मृतकहरुको कारोबारबारे सोधपुछ गरेको थियो । खोजबिनका क्रममा उनीहरुको कारोबार सञ्जाल धेरैतिर र करोडमा भएको प्रहरीले जानकारी लियो । त्यसपछि प्रहरीले कारोबार साझेदारहरुको ‘कनेक्सन’ खोज्न थालेकोह हो ।

कनेक्सन खोज्ने क्रममा साझेदार अनिलकुमार काठमाडौंको बल्खुमा बस्ने गरेको पत्तो लाग्यो । उनलाई टे«सगर्दा प्रहरीले मोरङबाट दुई जनालाई नियन्त्रणमा लिन सफल भयो । त्यसपछि पक्राउ परेकाहरुबाट सुपारी दिने मुख्य योजनाकार सिरहाका अनिलकुमार मण्डल भएको र उनकै योजनामा ललितपुरमा पनि एक जनाको हत्या गरेर गाडेको रहस्य खुलेको हो ।

त्यञ्जिेलसम्म प्रहरीले भारतीयहरुसमेत सामेल भएको किलर गिरोहको संलग्नता पहिचान गरिसकेको थियो । तर ललितपुर र धनपालथानको कनेक्सनको सुईंको बाहिरिएपछि थप पाँच जनालाई तत्काल पक्राउ गर्न प्रहरी असफल भएको हो ।

कारोबार अझै रहस्यमय

प्रहरीले मुख्य योजनाकार र गिरोहका दुई जना सदस्यलाई पक्राउ गरे पनि कारोबार र लगानीबारे अझै सार्वजनिक गरेको छैन । घरजग्गा, निर्माण, उद्योगदेखी हाईड्रोपावरसम्म लगानी गरेको भनिएका उनीहरुको कारोबार करोडौंमा रहेको विवरण प्रहरीले प्राप्त गरेको छ । तर उनीहरुको कारोबार वैध वा अवैध कस्तो थियो भन्ने बारे प्रहरीले अझै खुलाउन चाहेको छैन ।

‘लगानीको प्रतिफल एकलौटी बनाउन साझेदारहरुको प्लान मर्डर भएको र उनीहरुको लगानी करोडौमा रहेको प्रष्ट हुन्छ । लगानी कस्तो हो त्यो हामीले पनि पत्तो लगाइसकेका छैनौं, अनुसन्धान गर्दैछौं,’ मोरङका एसपी जर्नादन जिसीले भने । उनका अनुसार पक्राउ परेका मुख्य योजनाकार अनिलकुमार विभिन्न कम्पनीका सञ्चालक र सिइओ रहेको देखिन्छ ।