बालुवाटार छलफलमा एमाले अध्यक्षको प्रसंग

प्रधानमन्त्रीको सरकारी निवास बालुवाटारमा आज सम्पन्न सत्ता गठबन्धन दलका शीर्ष नेताहरुको बैठकमा प्रमुख प्रतिपक्षी दल एमालेका अध्यक्ष केपी शर्मा ओलीबारे लामो चर्चा भएको छ । समसामयिक राजनीतिको समीक्षा गर्ने क्रममा उहाँको सन्दर्भ आएको सहभागी एक जना नेताले बताए ।

‘राजनीतिक अवस्थाको समीक्षा गर्ने क्रममा एमाले अध्यक्षले फागुन १ गतेदेखि चालेको नयाँ रणनीति र षड्यन्त्रबारे सबैजसोले आफ्ना कुरा राख्नुभयो । सबै जना उहाँको खेल बारेमा आफ्नै ढंगले व्याख्या गर्दै उक्त षड्यन्त्रलाई चकनाचुर पारिएकोमा सहमत देखिए,’ती नेताले भने ।

छलफलमा सहभागी नेताहरुले आइतबार संसदबाट अनुमोदित एमसीसी सम्झौता र ब्याख्यात्मक घोषणाबारे एमसीसी मुख्यालयको रेस्पोन्सको बारेमा प्रधानमन्त्री शेरबहादुर देउवासँग जिज्ञासा राखेको बताइन्छ । जिज्ञासाको जवाफ दिँदै प्रधानमन्त्रीले अधिकांश देशमा एमसीसीले रेस्पोन्स गरेको उदाहरण दिनुभएको थियो ।

बैठकमा नेताहरुबीच सत्ता गठबन्धनलाई थप बलियो बनाएर अघि बढ्नेमा सहमति भएको छ । आजको छलफलमा आगामी चुनावमा गरिने तालमेलबारे कुनै कुरो नभएको स्रोतको दाबी छ । तर चुनावमा मिलेर जानुपर्ने भन्ने विषयमा अनौपचारिक कुराकानी भएको थाहा भएको छ ।

बैठकमा काँग्रेसका तर्फबाट प्रधानमन्त्री एवम् सभापति शेरबहादुर देउवा,सञ्चार तथा सूचना प्रविधिमन्त्री ज्ञानेन्द्रबहादुर कार्की, नेता रामचन्द्र पौडेल सहभागी हुनुभयो ।

त्यस्तै,माओवादी केन्द्रका अध्यक्ष पुष्पकमल दाहाल प्रचण्ड, नेता नारायणकाजी श्रेष्ठ, एकीकृत समाजवादीका अध्यक्ष माधवकुमार नेपाल,सम्मानित नेता झलनाथ खनाल,जसपाका अध्यक्ष उपेन्द्र यादवलगायतका नेता सहभागी हुनुहुन्थ्यो ।