बाँकी पुलिस भोलि बिहान हिँड्ने

स्थानीय तह निर्वाचनका लागि भोलिदेखि ७७ वटै जिल्लामा प्रहरी परिचालन गरिने भएको छ । प्रहरी प्रधान कार्यालयले चुनावमा खटिने कर्मचारीहरुलाई आ-आफ्नो कार्यक्षेत्रमा पठाउन लागेको हो ।

चुनावी सुरक्षाका लागि यसअघि नै विभिन्न जिल्लामा प्रहरी खटिइसकेका छन् । तीबाहेक खटाउन बाँकी रहेका प्रहरीलाई भोलिदेखि जिल्ला-जिल्लामा पठाउन लागिएको प्रहरी प्रधान कार्यालयको प्रशासन शाखाले जनाएको छ ।

शाखाले हेडक्वार्टर र उपत्यकाका प्रहरी युनिटहरुलाई आज पत्राचार गर्दै भोलि बिहान ९ बजेभित्र बन्दोबस्तीका सामग्रीसहित तम्तयार रहन निर्देशन दिएको हो ।

प्रधान कार्यालयबाट खटिएर जानेलाई हेडक्वार्टरको खेल मैदान र उपत्यकाभित्रका अन्य प्रहरीलाई काठमाडौँ उपत्यका प्रहरी कार्यालय रानीपोखरीमा भेला हुन भनिएको छ ।