नागढुङ्गाबाट १३५ बोरा रासायनिक मल बरामद

प्रहरीले बिल बिनाको एक सय ३५ बोरा रासायनिक मल बरामद गरेको छ । चन्द्रागिरि नगरपालिका–२ स्थित नागढुङ्गाबाट ना.६ ख ५४८८ नम्बरको ट्रकबाट बिल बिनाको उक्त रासायनिक मल प्रहरीले बरामद गरेको हो ।

प्रहरीले ट्रकका चालक मकवानपुरको मनोहरी गाउँपालिका–९ बस्ने २३ वर्षीय स्वदेश उप्रेतीलाई पनि पक्राउ गरेको छ ।

वीरगञ्जबाट काठमाडौंतर्फ आउँदै गरेको उक्त ट्रकलाई प्रहरी प्रभाग नागढुंगाबाट खटिएको टोलीले जाँच गरेको थियो । सोही अवस्थामा बिल बिनाको रसायनिक मल फेला परेको हो ।

बरामद मल र ट्रकसहित चालकलाई आवश्यक कारवाहीका लागि त्रिभुवन विमानस्थल भन्सार कार्यालय गौचरमा बुझाइएको प्रहरीले जनाएको छ ।