श्रीमतीले राखी बाँध्नुअघि नै श्रीमान्ले घाँटी थिचेर बिताइदिए

पर्सामा आज बिहानै श्रीमानले श्रीमतीको घाँटी थिचेर हत्या गरेका छन् । वीरगञ्ज महानगरपालिका–२३ का २६ वर्षीय दिनेशप्रसाद यादवले २३ वर्षीया श्रीमती प्रतिमाकुमारी यादवको घाँटी थिचेर हत्या गरेका हुन् ।

आज तराइमा राखी पर्व धुमधामसँग मनाइन्छ । विशेषगरी दिदी बहिनीले दाजुभाईको मंगलमय कामना गर्दै राखी बाँध्ने चलन छ । राखीकै दिन बिहान दिनेशले श्रीमती प्रतिमाको हत्या गरिदिएका छन् । श्रीमती हत्याको आरोपमा दिनेशलाई लगत्तै नियन्त्रणमा लिइएको जिल्ला प्रहरी कार्यालय पर्साका प्रहरी नायव उपरीक्षक प्रल्हाद कार्कीले जानकारी दिए ।

जिल्ला प्रहरी कार्यालयबाट खटिएको टोलीले घटनाको मुचुल्का उठाई शव पोष्टमार्टमको निम्ति नारायणी अस्पताल वीरगञ्ज पठाएको छ । दिनेशविरुद्ध कर्तव्य ज्यान मुद्दामा थप अनुसन्धान भइरहेको प्रहरीले बताएको छ ।