अनौठो बलात्कार, अचम्मको अफर

न्याय निसाफका लागि कहलिएका गोरखाका राजा राम शाहको कथन थियो, ‘न्याय नपाए गोरखा जानु ।’ न्याय सम्पादनमा निष्पक्षताको सवाल उठ्दा अहिले पनि यही भन्ने गरिन्छ । आजको युगमा न्याय नपाए कहाँ जाने ? निःसन्देह, सबैको आस्था र विश्वासको धरोहर न्यायालय हो । तर, कैयौँ वर्षपहिले नै न्याय सम्पादनमा निष्पक्षता खोज्ने त्यो चेतना आजको उन्नत लोकतान्त्रिक समाजलाई नै गिज्याउने गरी बर्बाद बनेको छ ।

न्यायमा आम मान्छेको सहज पहुँच अहिले पनि छैन । त्यसैले त न्यायालयमाथि अनेकौँ प्रश्न र आशंका उठ्ने गरेका छन् । न्यायसम्पादन नै ठप्प हुने गरी न्यायाधीश, नेपाल बार एशोसिएसन, कानुन व्यवसायी र सिंगै न्याय क्षेत्र आन्दोलित हुनुको कारण पनि त्यही हो । तथापि, अदालत र न्यायाधीशहरू मुद्दाको फैसला गर्दा सेटिङमार्फत न्याय किनबेच हुने गरेको आरोपबाट मुक्त छैनन् ।

पछिल्लो उदाहरण हुन्, २१ महिने दूधे बालक काखमा बोकेर न्यायको खोजीमा काठमाडौँका सडक गल्लीतिर भौँतारिइरहेकी महोत्तरीको जलेश्वर नगरपालिका–८ की २१ वर्षीया सोनालकुमारी सिंह अर्थात् निहारिका राजपुत ।

यस्तै, अर्को एउटा मुद्दामा पनि अदालतले पीडितलाई दुःख दिएर अभियुक्तलाई जोगाउन खोजेको आरोप लागेको छ । गोरखाको एउटा विद्यालयमा मास्टरी गर्ने सोझो श्रीमान्लाई उतै छाडी काठमाडौँमा अर्कै केटा खेलाउने युवतीले अनेक हत्कण्डा अपनाएर त्यो पुरुषलाई फसाउन खोजेपछि उनीहरूको रामकहानी बाहिर आएको छ । घरमा श्रीमान् हुँदाहुँदै विदेश बस्ने परपुरुषसँग लसपस गरेर उसैका विरुद्ध मुद्दा मामिलामा उत्रिएकी गोरखाकी युवतीलाई जोगाउन भएभरको शक्ति लागेको पीडित पक्षको दाबी छ ।

गोरखाका ती पुरुष केही वर्षदेखि देशबाहिर छन् । विदेशमा हुँदै महिलासँग उनको अन्तरंग सम्बन्ध झांगिएको थियो । शुरुमा सामान्य चिनजानमा रहेका उनीहरू तीन/चार वर्षदेखि फेसबुकमार्फत छुट्टिनै नसक्ने गरी नजिकिएका हुन् । लोग्नेलाई छलेर परपुरुषको अँगालोमा बाँधिएकी ती महिला काठमाडौँमा आनन्दले बसिरहेकी थिइन् । यसैबीच गत दसैँमा वाचाअनुसार प्रेमी नेपाल नआएपछि नखरा शुरु भयो ।

घटनाका जानकारहरूका अनुसार सँगै बसेर दसैँको टीका लगाउने, घुम्न जाने र रमाइलो गर्ने युवतीको चाहना थियो । तर, प्रेमी नआएपछि तनावमा परेकी उनले भाइबरबाटै टीका लगाइदिन आग्रह गरिन् । आफ्नो हातबाट टीका नलगाई गोर्खाका पतिको हातको टीका नलगाउने प्रेमिकाको अड्डी विदेशबाट पुरुषले पूरा गर्न सक्दैनथे । त्यसपछि उनीहरूबीच लफडा शुरु भयो र भाइबरमा लाइभ गरेर आत्महत्या गर्न भन्दै डोरीसहित युवती शिवपुरीको जंगलतिर लागिन् ।

आफ्ना कारण युवतीले ज्यान फाले अनाहकमा फसिने डरका कारण पुरुषले आफूसँग भएका कुराकानीको संवाद र घटनाबारे गोरखास्थित उनका श्रीमान्लाई खबर गरिदिए । यो घटनाबाट श्रीमान् नछाडी अर्को केटासँग मस्ती गर्ने योजना भताभुंग भएपछि युवतीले बदला लिने उपाय खोज्न थालिन् । विदेशबाट फर्किनेबित्तिकै जेल हाल्ने तयारीसाथ प्रेमिकाले बनाएको योजनाको शिकार भएका पुरुष अहिले मुद्दा–मामिलामा परेका छन् ।

वैशाखमा नेपाल आउने बताएका उनीविरुद्ध युवतीले प्रहरीको साइबर ब्युरोमा जाहेरी दिइवरी पक्राउ पुर्जी लिइराखेकी थिइन् । त्यही आधारमा २ बजे काठमाडौँ उत्रिएका ती पुरुषलाई प्रहरीले पाँच बजे समातेर करिब १५ दिन हिरासतमा राख्यो । अहिले दुई लाख १० हजार धरौटीमा निस्किएका उनका विरुद्ध उच्च अदालत पाटनमा मुद्दा छ । गत बिहीबार न्यायाधीश महेश शर्मा र नारायणप्रसाद पौडेलको संयुक्त इजलासमा पेशी चढेको मुद्दा हेर्न नभ्याउनेमा परेपछि भोलिलाई अर्को सुनुवाइ तोकिएको छ ।

भक्तपुरको अर्को त्यस्तै मुद्दामा जिल्ला न्यायाधीशले अभियुक्तलाई सफाइ दिएको आरोप लागेको छ । चिनजानकी एक युवतीलाई जबर्जस्ती मुखमैथुन गरेको आरोप लागेका विकास तौजले नामक युवकलाई न्यायाधीश स्वीकृति पराजुलीले सफाइ दिएपछि पीडित पक्ष उच्च अदालत पुगेको छ ।

जिल्ला अदालतको फैसलाविरुद्ध परेको रिटमा सुनुवाइ गर्दै साउन २० गते उच्च अदालत पाटनका न्यायाधीश रमेश ढकाल र बालेन्द्र रूपाखेतीको इजलासले अभियुक्तलाई कसूरदार ठह¥याएको छ । स्वीकृति पराजुलीको इजलासले फास्टट्रयाकबाट मुद्दा टुंगोमा पु¥याएर विकासलाई धरौटीमा छाडेको थियो ।

यो घटनाका दोषी विकासले मिलापत्रका लागि पीडित पक्षलाई १ करोडसम्म अफर गरेको प्रहरी बयानमै उल्लेख छ । तर, युवती र उनको परिवारले पैसा लिएर मिलापत्र नगर्ने अडान लिएको कारण मुद्दा लम्बिएको हो ।

उच्च शिक्षा अध्ययनका लागि सर्लाहीबाट आएकी ती युवती दिदीसँगै भक्तपुरमा बस्थिन् । दिदीको होटल छ । सिसिआरसी कलेजमा साइन्स पढ्ने उनी प्लस टु सकेर दिदीलाई सघाउन होटलमा जाने गर्थिन् । त्यही क्रममा त्यहाँ आइरहने विकाससँग चिनजान भयो । दिदीले पहिले नै चिनेको र इञ्जिनियर पढ्ने केटा भएकाले नजिकिन थालिन् ।

त्यही क्रममा एक दिन विकास होटलमा आए । राम्रै कुराकानी भयो । खाजा खाइसकेपछि विकासलाई होटलमै छाडेर युवती नजिकै रहेको कोठामा गइन् । लगत्तै विकास पनि पुगे । प्रहरीको बयानमा विकासले आफूले पहिले नै कोठा देखेको र बारम्बार आउजाउ हुने गरेको बताएका छन् ।

पीडितको दाबीअनुसार विकासले आँखामा पट्टी बाँधेर आफ्नो अंग सुँघाउने र युवतीले पहिचान गर्नुपर्ने अनौठो खेल खेल्ने प्रस्ताव राखेका थिए । विश्वासभन्दा ठूलो कुरा के हुन्छ र ! युवती राजी भइन् । त्यसक्रममा उसले युवतीलाई आफ्नो लिंग सुँघाइदिएको र प्रतिवाद गरेपछि समातेर त्यहीँ जबर्जस्ती मुखमा विर्य स्खलन गराएको दाबी पीडित पक्षले गरेको छ ।

युवतीले प्रहरी र सरकारी वकिललाई दिएको बयानमा आफू एकदम डराएकाले तत्काल घटनाबारे कसैलाई भन्न नसकेको बताएकी छन् । के गरौँ कसो गरौँ भन्ने सोच्दासोच्दै भोलिपल्ट सर्लाहीमा रहेकी आमालाई जानकारी गराएको र तेस्रो दिन जिल्ला प्रहरी परिसर भक्तपुरमा जाहेरी दिएको बयानमा उल्लेख छ । युवतीले उजुरी लिएर जाँदा विकास अर्को मुद्दामा त्यहीँ थुनामा थिए ।

यो मुद्दाको फाइल हेर्दा प्रारम्भमा युवतीको पक्षमा देखिएको प्रहरी पछि फेरिएको र बयानदेखि सबैमा उसको पीडकप्रति समर्थन रहेको देखिन्छ । सरकारी वकिलको पनि पीडितप्रति बलियो समर्थन रहेको पाइन्न । पीडितलाई ५०–६० लाख लिएर घटना मिलाउन प्रस्ताव गरेको बयानमै लेखिएको छ । १ करोडसम्म नगद र विदेश पढ्न पठाउने अफर गरेको पीडित पक्षले बताएको छ ।

यो घटनामा सामाजिक अभियन्ता भन्नेहरूले समेत पैसा खाएर मुद्दा फिर्ता लिन युवती र उनको परिवारलाई दबाब दिएको श्रोत बताउँछ । पीडित पक्ष पैसा लिएर मिलापत्रमा जान राजी नभएपछि जिल्ला न्यायाधीशलाई प्रभावमा पारेर पीडकको पक्षमा फैसला गराइएको सरकारी वकिलहरूकै आशंका छ । फैसलामा अभियुक्तले सफाइ पाउनुका कारण निकै चलाखीपूर्ण ढंगले लेखिएको बताइन्छ ।