दुबईबाट आएका भारतीय काठमाडौँ एअरपोर्टमा रोकिए

त्रिभुवन अन्तर्राष्ट्रिय विमानस्थलबाट एक भारतीय नागरिक अवैध सुनसहित पक्राउ परेका छन् । यूएईको सारजाहबाट आएका पश्चिम बिहारका ३४ वर्षीय विकास महाजन लुकाएर ल्याएको सुनसहित समातिएका हुन् ।

एअर अरेबियाको विमानबाट काठमाडौं आएका विकासलाई त्रिभुवन विमानस्थल विशेष सुरक्षा कार्यालयले आगमन टनेल गेटबाट हिजो पक्राउ गरेको प्रहरीले जनाएको छ । प्रहरीका अनुसार विकासको साथबाट सात सय ७७ ग्राम तौल बराबरको एक थान सुन, पाँच सय दरका १९ हजार पाँच सय भारतीय रुपैयाँ र चार सय २० यूएई दिराम बरामद भएको छ ।

बरामद सामानसहित आवश्यक अनुसन्धानको निम्ति उनलाई त्रिभुवन अन्तर्राष्ट्रिय विमानस्थल भन्सार कार्यालय गौरचणमा बुझाइएको विमानस्थल प्रहरीले जनाएकाे छ ।