भारतबाट भित्रिएको एक ट्रक गहुँ नाकामा बरामद

मोरङमा भन्सार छलेर ल्याएको एक ट्रक गहुँ सशस्त्र प्रहरीले नियन्त्रणमा लिएको छ । भारतको सोनापुरबाट रतुवामाई नगरपालिका-१ हडियाडाँडा आउँदै गरेको को १ ख ४२२१ नम्बरको ट्रक सशस्त्रले समातेको हो ।

उक्त ट्रकबाट दुई सय १० बोरा गहुँ बरामद गरिएको सशस्त्र प्रहरीले जनाएको छ । प्रहरीका अनुसार गहुँ चार लाख ७२ हजार पाँच सय र ट्रक १५ लाख मूल्य बराबरको छ ।

सशस्त्रको बीओपी बरडंगाबाट खटिएको टोलीले ट्रक चालक सुनवर्षी नगरपालिका–४ का ४८ वर्षीय इन्द्रवेव राजवंशीलाई पनि पक्राउ गरेको छ ।

बरामद गहुँसहित चालकलाई आवश्यक कारबाहीका लागि हिजो विराटनगर भन्सार कार्यालयमा बुझाइएको सशस्त्र प्रहरीले बताएको छ ।