अवहेलना मुद्दामा मेयर बालेनलाई लिखित जवाफ पठाउन सर्वोच्चको आदेश

सर्वोच्च अदालतले काठमाडौँ महानगरपालिकाका मेयर बालेन्द्र साहलाई अवहेलना मुद्दामा सात दिनभित्र लिखित जवाफ बुझाउन आदेश दिएको छ । नर्भिक अस्पतालको संरचना भत्काउने महानगरपालिकाको निर्णयमा सर्वोच्च अदालतले अन्तरिमकालीन रोक लगाएपछि मेयर साह रुष्ट बनेका थिए ।

उनले संविधान संशोधन गरेर ’नक्सा पासको अधिकार अदालतलाई दिऔँ’ भन्दै सामाजिक सञ्जाल मार्फत असन्तुष्टि व्यक्त गरेका थिए । सोही विषयलाई लिएर सर्वोच्च अदालतको अवहेलना गरेको भन्दै मेयरविरुद्ध अधिवक्ता दीपकराज जोशीले सर्वोच्चमा मुद्दा दायर गरेका थिए ।

न्यायाधीश हरिकृष्ण कार्कीको एकल इजलासले आज अवहेलना मुद्दामा लिखित जवाफ माग गर्ने आदेश गरेको हो ।