भान्साको झ्यालबाट छिरेर लाखौं चोर्ने अक्कल लगाएका बुद्धि समातिए

काठमाडौँको एउटा घरमा भान्सा कोठाको झ्यालबाट घरभित्र पसेका चोरले लाखौं लुटेका छन् । घरको तेस्रो तलामा रहेको भान्साको झ्यालबाट भित्र पसेर चोरी गरेको आरोपमा एक जना पक्राउ परेका छन् ।

नुवाकोटको ककनी गाउँपालिका, २ घर भई हाल डल्लु बस्ने ४२ वर्षीय बुद्धि तामाङलाई लैनचौरबाट खटिएको प्रहरी अधिकृतसहितको अनुसन्धान टोलीले हिजो नियन्त्रणमा लिएको हो ।

महानगरपालिका १६ स्थित बुद्ध टोल मार्गमा शंकास्पद रुपमा हिँडिरहेको अवस्थामा उनलाई नौ लाख ५२ हजार नौ सय ९० रुपैयाँसहित पक्राउ गरिएको प्रहरीले जनाएको छ ।

पक्राउ परेका बुद्धिलाई मुलुकी अपराध संहिता ऐन २०७४ को परिच्छेद २० को दफा २४१ अनुसार ‘चोरी सम्बन्धी कसूर’ मा काठमाडौँ जिल्ला अदालतबाट पाँच दिन म्याद थपको अनुमति लिएर अनुसन्धान भइरहेको बताइएको छ ।