मेयर बालेन साह डोजर छाडेर क्यासिनोतिर

काठमाडौँ महानगरपालिकाले सात दिनभित्र आफ्नो क्षेत्रभित्रका सबै क्यासिनोलाई मनोरञ्जन कर चुक्ता गर्न आदेश दिएको छ । महानगरले आज जारी गरेको सूचनामा उक्त निर्देशन दिइएको छ ।

बागमती प्रदेश आर्थिक ऐनअनुसार क्यासिनो प्रवेश गर्ने ग्राहकबाट मनोरञ्जन कर लिनुपर्ने व्यवस्था रहेको र महानगरले सोहीबमोजिम क्यासिनोहरूलाई पटक पटक कर तिर्न आग्रह गर्दै आएको बताइन्छ । तर, क्यासिनोहरूले आर्थिक वर्ष २०७५/७६ देखि मनोरञ्जन कर नतिरेपछि बाध्य भएर उक्त सूचना जारी गरिएको महानगरको दाबी छ ।

महानगरका अनुसार डेल्टिन क्यासिनो होटल म्यारियट, क्यासिनो प्यालेस अन्नपूर्ण होटल, क्यासिनो र्याड र्याडिसन होटल, प्राइड इन्टरटेनमेन्ट एन्ड रिक्रिएसन, हायात होटल, माजोङ्ग इन्टरटेनमेन्ट होटल सोल्टी, बाल्को क्यासिनो होटेल एलफ्ट र बेली क्यासिनो मल्ल होटलले मनोरञ्जन कर तिरेका छैनन् ।तीन वर्षदेखि नतिरेको करको जरिवानासहित सात दिनभित्र नतिरे महानगरपालिकाको राजश्व ऐन, २०७५ बमोजिम कारबाही गरी सरकारी बाँकी सरह बाँकी कर असुलउपर गरिने जनाएको छ ।