मोटरसाइकल चोर्ने ठूलो गिरोह पक्राउ

काठमाडौं उपत्यकामा श्रृखलाबद्ध मोटरसाइकल चोरी गर्ने एउटा गिरोह समातिएको छ । सिन्धुपाल्चोकको मेलम्ची नगरपालिका–१० घर भएका १८ वर्षीय निसान सापकोटा, ३२ वर्षीय रामचन्द्र रावल र इन्द्रावती गाउँपालिका–४ घर भएका ३२ वर्षीय पुष्कर काफ्लेलाई मोटरसाइकलसहित नियन्त्रणमा लिइएको प्रहरीले जनाएको छ ।

उपत्यका अपराध अनुसन्धान कार्यालयबाट खटिएको टोलीले गत साउन महिनामा बौद्ध एरियाबाट हराएका मोटरसाइकल खोज्ने क्रममा मोटरसाइकलसहित उनीहरुलाई पक्राउ गरेको हो । उनीहरुले पठाओ मोटरसाइकल चालकसँग चिनजान बढाउने र टिकटक बनाउने बहानामा मोटरसाइल मागेर फरार हुने गरेको प्रहरी अनुसन्धानबाट खुलेको छ ।प्रहरीका अनुसार उनीहरूले चोरीका मोटरसाइकल सिन्धुपाल्चोक मेलम्ची–१२ स्थित रावल लेथ एण्ड इन्जिनिरिङ वर्कशपमा पुर्याएर एउटा मोटरसाइकलको पार्टपुर्जा अर्कोमा फेर्ने गरेको पाइएको हो । साथै उनीहरुले मोटरसाइकलकोे पार्टपुर्जा, इञ्जिन र चेसिसको नम्बर लेखिएको भागलाई चिन्न नसकिने गरी लेथ मेसिनले टुक्रा–टुक्रा पारी बाँकी सामान कवाडीलाई बिक्री वितरण गर्ने गरेको प्रहरीले जनाएको छ ।

तीनै जनालाई नियन्त्रणमा लिएर आवश्यक कारवाहीका निम्ति प्रहरीवृत्त बौद्धमा पठाइएको प्रहरीले बताएको छ ।