उत्तरबाट आइपुगे रास्ट्रपतिपछिका शक्तिशाली पाहुना

चिनियाँ राष्ट्रिय जनकङ्ग्रेसका स्थायी समिति अध्यक्ष (सभामुख) लि चान्सु नेपालको औपचारिक भ्रमणका लागि अहिले भर्खरै बिमान बोइङ्ग B2472 बाट काठमाडौँ आइपुग्नु भएको छ । सभामुख अग्निप्रसाद सापकोटाको निमन्त्रणामा तीनदिनका लागि आउनुभएका अध्यक्ष लिले यहाँ रहँदा उच्चस्तरीय राजनीतिक तथा कूटनीतिक भेटघाट गर्ने कार्यक्रम छ ।

परराष्ट्र मन्त्रालयका अनुसार चिनियाँ पाहुना टोली विमानस्थलबाट सोझै होटल सोल्टीतर्फ गएको छ । सवा घण्टा होटलमा आराम गरेपछि नेपाली समकक्षीसँग भेटवार्ताका लागि लि संसद भवन नयाँ बानेश्वर जानुहुनेछ । सभामुखले लिको सम्मानमा आजै रात्रिभोजको आयोजना गर्नुभएको छ ।

भ्रमणको दोस्रो दिन भोलि अध्यक्ष लिले महत्वपूर्ण राजनीतिक भेटघाट गर्नुहुनेछ । प्रधानमन्त्री शेरबहादुर देउवा र परराष्ट्रमन्त्री डा. नारायण खड्कासँग उहाँले छुट्टाछुट्टै भेट गर्नुहुनेछ । प्रधानमन्त्रीसँग बालुवाटारमा दिउँसो पौने चार बजे भेटवार्ता हुने कार्यसूची छ ।

त्यस्तै,राष्ट्रियसभा अध्यक्ष गणेश तिमिल्सिनासँग पनि लिले भोलि नै भेटवार्ता गर्ने कार्यसूची छ । एमाले अध्यक्ष केपी ओली र माओवादी केन्द्रका अध्यक्ष पुष्पकमल दाहाल प्रचण्डसँग पनि भोलि बिहान ९ बजेपछि सँसद भवनमा बेग्लाबेग्लै भेटवार्ता हुनेछ ।

पर्सि बुधबार अपराह्न साढे ३ बजे अध्यक्ष लि राष्ट्रपति भेट्न शीतल निवास पुग्नुहुनेछ । राष्ट्रपति विद्यादेवी भण्डारीलाई भेट्न साढे ३ बजे शीतल निवास पुग्नुअघि उहाँ भक्तपुर दरवार स्क्वायर घुम्न जानुहुनेछ। भ्रमणको अन्तिम दिन बिहिबार लि यतैबाट दक्षिण कोरियातर्फ लाग्नुहुनेछ ।

यता,चिनियाँ राष्ट्रपति सि चिनफिङले यसै साता रुसी राष्ट्रपति भ्लादिमिर पुटिनसँग भेट्दै हुनुहुन्छ । रुस,मङ्गोलिया भएर आउने अध्यक्ष लिले नेपालका सबैजसो विशिष्ट ब्यक्तित्वलाई भेट्दा राष्ट्रपति सिले कजाकस्थान गएर रुसी रास्ट्रपति पुटिनलाई भेट्ने कार्यक्रम छ । अध्यक्ष लिको नेपाल आएको टोलीका १ सय जना सोल्टी,११ जना ह्यात र १४ जना द्वारिकाजमा छरिएर बस्ने छन् ।

कोरोनापछि चिनियाँ उच्च नेतृत्व देश बाहिर निस्केको यो दुर्लभ अवसर पनि हो ।