नक्कली पेस्तोल देखाएर तीन वटा आइफोन लुटियो

राजधानीमा अनलाइनबाट मोबाइल खरिद गर्ने बहानामा छिरेका दुई जनाले नक्कली पेस्तोल देखाएर तीन थान आईफोन लुटेका छन् । हिजो दिउँसो बानेश्वरको कात्यायनी मन्दिर नजिकै कपिल श्रेष्ठको केएस मोबाइल पसलमा लुटपाट भएको बताइन्छ ।

बाल सुन्दर सापकोटासहित दुई जनाले आफूहरुलाई प्रहरी भन्दै नक्कली पेस्तोल देखाएर तीन थान आइफोन लुटेका हुन् । प्रहरीको अपराध अनुसन्धान कार्यालयबाट खटिएको टोलीले हिजै बेलुकी सोही मन्दिर नजिकैबाट लुटिएको मोबाइल तीन थान, नक्कली पेस्तोल दुई थान र गोली पाँच थानसहित उनीहरुलाई नियन्त्रणमा लिएको हो ।

पक्राउ परेका सापकोटा र अर्जुन कार्कीलाई डाँका कसुरमा कानूनी कारबाहीको निम्ति प्रहरी वृत्त बानेश्वर पठाइएको र सो सम्बन्धमा थप अनुसन्धान कार्य जारी रहेको प्रहरी उपरीक्षक कृष्णप्रसाद कोइरालाले जानकारी दिएका छन् ।