राष्ट्रपतिविरुद्ध मधेसमा चरणवद्ध आन्दोलन शुरु

नागरिकता विधेयक प्रमाणीकरण नगरेर राष्ट्रपति विद्यादेवी भण्डारीले संविधानको घोर उल्लंघन गरेको भन्दै सत्तारुढ जनता समाजवादी पार्टी (जसपा) ले चरणवद्ध आन्दोलन घोषणा गरेको छ ।

जसपा मधेस प्रदेश समितिका मुख्य सचिव दिनेशकुमार यादवले भोलिदेखि सोज १७ गतेसम्म पहिलो चरणमा संघर्षको कार्यक्रम सार्वजनिक गरेका छन् । जसअनुसार भोलि नागरिक समाज, बुद्धिजीवी,पत्रकार, शिक्षक,प्राध्यापक, व्यापारी,कानून व्यवसायी,पेशाकर्मी तथा अन्य सरोकारवालाहरुबीच अन्तरक्रिया गर्ने जनाइएको छ ।मधेसका आठ वटै जिल्ला सदरमुकामहरूमा भ्रातृ संगठनहरूको विरोध प्रदर्शन तथा राष्ट्रपतिको पुतला दहन गर्ने कार्यक्रम पनि सार्वजनिक गरिएको छ ।

असोज १३ गते जनप्रतिनिधिलाई विधेयक र अध्यादेशबारे जानकारी गराउने र असोज १५ देखि १७ गतेसम्म सबै पालिका तथा वडास्तरीय भेला गरी राष्ट्रपति भण्डारीले चालेको कदम तथा विधेयकको बारेमा सर्वसाधारणलाई जानकारी गराउने जसपा मधेस प्रदेश समितिले आज जारी गरेको विज्ञप्तिमा उल्लेख छ ।

आन्दोलनलाई सफल तुल्याउन मुख्य सचिव यादवले मधेशका आठै जिल्लाका पार्टी समन्वय समितिमा परिपत्र गरेका छन् ।