भ्यानको ठक्करबाट दुई प्रहरी सिकिस्त

बारामा भ्यानको ठक्करबाट दुई प्रहरी घाइते भएका छन् । फेटा गाउँपालिका– १, भलुही चोकमा गएराति म्याजिक भ्यानले मोटरसाइकललाई ठक्कर दिँदा ड्युटीमा रहेका दुई प्रहरी गम्भीर घाइते भएका हुन् ।

वीरगञ्जबाट कलैयातर्फ जाँदै गरेको ना.१ज ७७६० नम्बरको म्याजिक भ्यानले विपरीत दिशाबाट आउँदै गरेको ना.१९प २३९० नम्बरको मोटरसाइकललाई गएराति पौने ११ बजे ठक्कर दिएको हो ।

पर्साको पोखरीया नगरपालिका–३ घर भइ इलाका प्रहरी कार्यालय निजगढमा दरबन्दी भएका तर जिल्ला प्रहरी कार्यालय बारामा कार्यरत प्रहरी हवल्दार नन्दु साह कानु घाइते भएका हुन् । त्यसैगरी मोटरसाइकल पछाडि सवार पर्साको वीरगञ्ज महानगरपालिका– २२ घर भइ इलाका प्रहरी कार्यालय लक्ष्मिनिया रौतहटमा दरबन्दी भएका र जिल्ला प्रहरी कार्यालयका सहयोगी असलोक प्रसाद यादव पनि घाइते भएका हुन् ।

उनीहरूको एनएमसी अस्पताल वीरगञ्जमा उपचार भइरहेको छ । भ्यान चालक फरार भएकाले खोजी भइरहेको इलाका प्रहरी कार्यालय प्रसौनी बाराले जनाएको छ ।