बढी भाडा असुल्ने १६ जना चालक पक्राउ

चाडपर्वको समयमा उपत्यकाबाट बाहिरिने यात्रुहरुलाई तोकिएको भन्दा बढी भाडा लिने १६ जना सवारी चालक पक्राउ परेका छन् । उनीहरु कोटेश्वर र नयाँबसपार्कबाट आज बिहानै पक्राउ परेको उपत्यका ट्राफिक प्रहरी कार्यालय रामशाहपथका प्रवक्ता एवम् प्रहरी बरिष्ठ उपरिक्षक राजेन्द्र प्रसाद भट्टले जानकारी दिए ।

पक्राउ परेका सबैलाई प्रहरी प्रभाग कोटेश्वर र गंगबुमा राखिएको छ । कोटेश्वरबाट आठ जना र नयाँबसपार्कबाट आठ जना पक्राउ परेका हुन् ।

चाडपर्वको समयमा यात्रुहरुलाई अनावश्यक हैरानी दिने, तोकिएको भन्दा बढी भाडा लिने, टिकटमा तोकिएको सिट नदिने जस्ता विभिन्न गतिविधी गर्ने चालकहरुलाई प्रहरीले पक्राउ गर्दै आएको छ ।