ड्राइभरको छेउमै एक झोला पैसा भेटियो

कपिलवस्तुबाट प्रहरीले स्रोत नखुलेको नगदसहित एक जनालाई पक्राउ गरेको छ । कृष्णनगरबाट चन्द्रौटातर्फ जाँदै गरेको लु.१ ख २३९७ नम्बरको बसका ड्राइभर एक झोला पैसासहित समातिएका हुन् ।

इलाका प्रहरी कार्यालय कृष्णनगरबाट खटिएको प्रहरीले बस चेकजाँच गर्दा हिजोराति ड्राइभर नजिकैको बोनटको भागमा १३ लाख आठ सय रुपैयाँ फेला परेको थियो । एक झोला पैसा भेटिएपछि सो बसका ड्राइभर प्युठानको प्युठान नगरपालिका–८, मानागाँउका ३४ वर्षीय शुशिल बहादुर पुन मगरलाई प्रहरीले पक्रेको हो ।

बसमा कसरी त्यत्रो रकम लगियो भन्नेबारे अनुसन्धान भैरहेको प्रहरीले जनाएको छ ।

जिल्ला प्रहरी कार्यालय, कपिलवस्तुका अनुसार बस चालक शुशिललाई नियन्त्रणमा लिएर आवश्यक अनुसन्धान तथा कारबाहीको निम्ति आन्तरिक राजश्व कार्यालय बुटवल पठाइएको छ ।