खानेपानीमन्त्रीको गाडीमा काँग्रेसको झण्डा, नम्बर प्लेट परिवर्तन गरेर आचारसंहिता उल्लंघन

निर्वाचन आचारसंहिता उल्लंघन गर्दै खानेपानीमन्त्री तथा नेपाली काँग्रेसका सहमहामन्त्री उमाकान्त चौधरीले चुनावी प्रचारप्रसारका निम्ति सरकारी गाडीको दुरुपयोग गरेका छन् । बारा क्षेत्र नम्बर १ मा सत्ता गठबन्धनका तर्फबाट प्रतिनिधि सभा सदस्य निर्वाचनमा उम्मेदवार रहेका काँग्रेस सहमहामन्त्री एवम् खानेपानीमन्त्री चौधरीले निर्वाचन क्षेत्रमा चुनावी प्रचारप्रसार गर्ने क्रममा सरकारी गाडीको नम्बर परिर्वतन गरेर प्रयोग गरेको पाइएको छ ।

मन्त्री चौधरीले रातो र निलो रंगको बा. २ झ ५८६१ नम्बरको नम्बर प्लेट परिवर्तन गरी बा.१२ च ७४३१ नम्बरको नयाँ प्लेट राखेर प्रयोग गरेका हुन् । बारा जिल्लाका मन्त्री चौधरी कोही हप्तादेखि घरमा बसेर चुनावी प्रचारमा होमिएका छन् ।

उनले चुनावी प्रचारमा सरकारी गाडी प्रयोग गर्दै आएको स्थानीय राम एकबाल चौधरीले बताए । ‘मैले पहिले मन्त्रीज्यूको यहि गाडीमा सरकारी नम्बर देखेको थिएँ, विगत तीन चार दिनदेखि निजी नम्बर हालेको देखेँ,’ चौधरीले भने ।

आगामी निर्वाचनका निम्ति जारी आचारसंहितामा नेपाल सरकार, प्रदेश सरकार, मन्त्री, स्थानीय कार्यपालिका तथा पदाधिकारीले कुनै पनि राजनीतिक दल वा उम्मेदवारको पक्ष विपक्षमा प्रचारप्रसारमा संलग्न हुन वा प्रचारप्रसार गर्न नपाइने उल्लेख छ ।

यसअघि स्थानीय तहको निर्वाचनमासमेत उनले आचारसंहिता उल्लंघन गर्दै चुनावी प्रचारप्रसारमा सरकारी गाडीको दुरुपयोग गरेको भन्दै स्थानीयले उजुर गरेका थिए ।