रक्सी पिएर खुकुरी हानी साथीको हत्या

चितवनको माडी नगरपालिका–४ घोसरीमा सँगै बसेर मदिरा सेवन गरेकामध्ये एक जनाको ज्यान गएको छ । मदिरा सेवनको क्रममा विवाद निम्तिएपछि एक जनाले आफ्नै साथीमाथि खुकुरी प्रहार गरेका हुन् ।

खुकुरी प्रहारबाट अन्दाजी ३३ वर्षीय जीवन नेपालीको हत्या भएको माडी प्रहरीले जनाएको छ । घटनास्थल नजिकै रगतमा लत्पतिएको खुकुरी फेला परेको छ ।

परियारको हत्या गरेको आरोपमा प्रहरीले उनकै साथी नवलपरासीका ३४ वर्षीय एक युवकलाई माडी–३ इनारबरुवाबाट पक्राउ गरेको छ । उनको पहिचान खुलाइएको छैन ।

अनुसन्धान बाँकी रहेकाले हत्या आरोपितको पहिचान नखुलाइएको जिल्ला प्रहरी कार्यालय चितवनका प्रवक्ता विजयराज पण्डितले जानकारी दिए । घटना हिजो राति १० बजेपछि भएको अनुमान छ ।

घटनास्थलमा घोप्टिएको अवस्थामा नेपालीको शव भेटिएपछि स्थानीयले प्रहरीलाई राति १२ बजे खबर गरेका थिए । नेपालीमाथि खुकुरी प्रहार गरेर भागेका आरोपितले घोसरी गाउँमा घरमा सुतिरहेकी एक महिलाको गहनासमेत लुटपाट गरेको बताइन्छ ।