बाजुराका मतदाताले रिसाउँदै भने ‘भोट बैंकको रुपमा प्रयोग नगरियोस्’

बाजुराको मार्तडीदेखि कोल्टीसम्मको सडक खण्डमा पहिरो जाँदा लामो समयसम्म यातायात सुचारु हुन सकेको छैन । करिब पाँच महिनापछि साँफे मार्तडी सडक खण्डको अमकोटको पहिरो पन्छ्याएका कारण केहि दिन अगाडि मात्र मार्तडीमा बस सेवा सञ्चालन भएको हो ।

नेताहरु चुनाव आएपछि गुलिया कुरा र आश्वासनबाट जनतालाई आकर्षित तुल्याउँछन् । तर जेठको पहिलो सातादेखि अबरुद्ध भएको मार्तडी–कोल्टी सडक खण्ड सुचारु हुन नसक्दा कोल्टीदेखि हुम्लासम्मका यात्रुहरुले पाएको सास्ती बारे कसैले चुईंक्क बोलेको सुनिएन । कसैले सडक खुलाउन गरेको प्रयास पनि देखिएन ।

स्थानीय कृष्ण राउतका अनुसार मंसिर ४ गते हुने प्रदेश तथा प्रतिनिधि सभा सदस्य निर्वाचनका लागि गाँउ गाउँमा पसेका नेताहरुले सडकको यस्तो दुरावस्था देख्दा पनि नदेखेझैँ गरेका हुन् । तर, सोही बाटो हिँडेर गाउँ गाउँमा पुगेपछि झुठा आश्वासन बाँड्न र चुनावी प्रचारमा उनीहरु रमाइरहेको देखिन्छ ।

बाजुरा जिल्लाबाट पटक पटक संसदमा प्रतिनिधित्व गरेका तत्कालीन माननीयहरु कर्णबहादुर थापा, जनकराज गीरी, लालबहादुर थापा, बद्री पाण्डेलगायतले पनि कोल्टी क्षेत्रका जनताको घरदैलोमा पुगेर यसबीचमा चुनावी अभियानको पहिलो चरण सकाएका छन् । तर सडकको बारेमा उनीहरुले गाउँलेलाई आश्वासन मात्र दिएको उनी बताउँछन् ।

तस्बिरमा प्रस्ट देख्न देखिएको पहिरो मार्तडी–कोल्टी सडक खण्डको बीचमा पर्ने बाजुरा जिल्लाको बडिमालिका नगरपालिका ७ मा गएको ठूलो पहिरो हो । स्थानीयहरु दुःख पोख्दै बताउँछन्, ‘सडकको अवस्था यस्तो छ कसरी दिउँ नेताहरुलाई भोट ? चुनाव आउनु अगाडि हाम्रो र गाउँको खुब प्रशंसा गर्छन् । अनेक वाचा पनि गर्छन् । तर चुनाव जितेपछी पाँच वर्ष नाकमुख देखिँदैन ।’

मार्तडी कोल्टी सडकमा वर्षायाममा पहिरो जानु स्वाभाविक हो । तर कात्तिकमा पनि सुख्खा पहिरो गएकाले सर्वसाधारण त्रसित छन् । स्थानीय तह, प्रदेश सरकार र संघीय सरकार सबै मौन देखिन्छन् । तीनै तहका सरकारले कानमा तेल हालेर बसेपछि स्थानीय रिसले आगो भएका हुन् ।

बाजुरा मुलुककै सर्वाधिक पिछडिएको जिल्ला हो । पिछडिएको क्षेत्रका स्थानीयले नेताहरुलाई प्रश्नको वर्षा गर्न थालेका छन् । बाजुराका जनता अझै विकटमुक्त हुन पाएका छैनन् । जिल्लाका अधिकांश बस्तीमा साँझ परेपछि अँध्यारो छाउँछ । त्यहाँका नागरिकले पनि सुविधा सम्पन्न जीवन खोज्नु अन्याय हो ? भनेर जिज्ञासा राख्न थालेका हुन् ।

भोट माग्न आँगमा पुगेका नेताहरुप्रति स्थानीयले आक्रोश व्यक्त गर्दै भनेका छन्, ‘नेतृत्व गणको ध्यान जाओस् कि हामीलाई जनताले नै जिताएका हुन् । उनकै एक मतको कारण आज हामी यो स्थानमा पुगेका छौं । पटक पटक हामीलाइ भोट बैंकको रुपमा मात्र प्रयोग नगरौं ।’