प्रचण्डले भनेर आफू बागी उठेको दीपेन्द्रको दावी

रोल्पाको प्रदेश सभा ‘ख’ का स्वतन्त्र उम्मेदवार दीपेन्द्र पुन ‘सिजल’ ले नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ र उपमहासचिव वर्षमान पुनको सहमतिमा उम्मेदवारी दिएको खुलासा गरेका छन् ।

वाम—लोकतान्त्रिक गठबन्धनको निर्णयविरूद्ध स्वतन्त्र उम्मेदवारी दिएका पुनले माओवादी नेतृत्वकै सहमतिमा उठेको दाबी गरेका हुन् । बागी उम्मेदवार पुनलाई उम्मेदवारी निष्क्रिय पार्न माओवादी केन्द्रका शीर्ष नेताहरूले दबाब दिइरहेका छन् ।

‘प्रचण्ड र वर्षमान पुनको सहमतिमा उम्मेदवारी दिएको हुँ,’आफूनिकट नेता तथा कार्यकर्तासँग पुनले भने, ‘कुनै भ्रममा नपर्नुहोला पार्टीबाट राजीनामा दिए पनि म माओवादी नै हुँ ।’

उम्मेदवार पुनमाथि गठबन्धनका नेताहरूले एमालेसँग साँठगाँठ गरेको गम्भीर आरोप लगाएपछि उल्टै माओवादीका शीर्ष नेताहरूको पोल खोलेका हुन् ।

उम्मेदवार पुन नेपाली काँग्रेसका उम्मेदवार तथा लुम्बिनी प्रदेश सभापति अमरसिंह पुनविरूद्ध चुनावी मैदानमा उत्रिएका हुन् । गठबन्धनको तर्फबाट रोल्पाको एउटा प्रतिनिधिसभा र प्रदेश (क) माओवादीले पाएको छ । त्यस्तै, प्रदेशसभा (ख) काँग्रेसको भागमा परे पनि पोलिट्व्यूरो सदस्यसमेत रहेका उनी असन्तुष्ट बन्दै गठबन्धनको बागी उम्मेदवार बनेका छन् ।

त्यसो त उनले निर्वाचनपछि माओवादीमै फर्किने हल्लालाई पनि पुष्टि गरेका छन् । ‘प्राविधिक रुपमा मैले पार्टीबाट राजीनामा दिए पनि नेतृत्व वर्ग र पार्टीपंक्तिको सहमतिको आधारमा उम्मेदवारी दिएको हुँ,’ उनले भने, ‘ढुक्क भएर कुनै भ्रममा नपरी चुनाव चिन्ह ‘धारा’ मा मतदान गर्न अनुरोध गर्दछु ।’