‘बेबी आईडी’ को नाममा सामाजिक सञ्जालमा महिलाको चरित्र हत्या गरियो

सामाजिक सञ्जालमा महिलाको चरित्र हत्या गरेको आरोपमा एक युवक पक्राउ परेका छन् । पक्राउ पर्नेमा सप्तरीको सुरुङ्गा नगरपालिका–१ घर भएका १९ वर्षीय सुमितकुमार थापा हुन् ।

उनले सामाजिक सञ्जालमा समिरा शर्मा (बेबी) नामको नक्कली आईडी बनाइ महिलाको चरित्र हत्या गरेका हुन् । नेपाल प्रहरीको साइबर ब्यूरोले उक्त आईडीबाट उनले अपरिचित महिलाको अश्लिल तस्बिर राखी सामाजिक सञ्जालमा पोष्ट गरेको अनुसन्धानबाट खुलेको बताएको छ ।

साथै उनले नक्कली आईडीबाट पीडित महिलाका आफन्तलाई अश्लिल म्यासेजहरु पठाउने, गाली बेइज्जती गर्दै मानसिक तनाव दिएको ब्यूरोले जनाएको छ ।

थापालाई इलाका प्रहरी कार्यालय भेडिया, सप्तरीले अस्ति नियन्त्रणमा लिएको हो । उनीविरुद्ध विद्युतीय कारोबार ऐन २०६३ अन्तर्गत जिल्ला अदालत काठमाडौंबाट आज ७ दिनको म्याद थप गरी अनुसन्धान थालिएको छ ।