काठमाडौंमा सूर्यलाई भोट मागेकी करिश्माले मोरङमा हलो भनिन्

गत बैशाखमा एमाले प्रवेश गरेकी अभिनेत्री करिश्मा मानन्धरले राप्रपा उम्मेदवारलाई भोट मागेकी छन् । उनले मोरङ ३ बाट प्रतिनिधि सभा सदस्यको उम्मेदवार बनेकी रेखा थापालाई जिताउन हलोमा मतदान गर्न आग्रह गरेकी हुन् ।

सो क्षेत्रमा एमालेबाट भानुभक्त ढकाल र नेपाली काँग्रेसबाट डा.सुनिल शर्मा उम्मेदवार छन् । ढकाल सोही क्षेत्रका निवर्तमान सांसदसमेत हुन् । काठमाडौंको निर्वाचन क्षेत्र नम्बर ५ मा एमाले वरिष्ठ उपाध्यक्ष ईश्वर पोखरेलको पक्षमा घरदैलो गरेकी करिश्माले मोरङमा ढकालको सट्टा थापालाई भोट मागेकी हुन् ।

उनले सामाजिक सञ्जालमा लेख्दै थापाको पक्षमा वकालत गरेकी छन् । ‘कलाकार राष्ट्रका अभिन्न अंग हुन् । संस्कृति, संस्कारका सम्बाहक हुन् । यो क्षेत्रको निर्माण, विकास गर्न धेरै कलाकारहरुले धेरै संघर्ष र परिश्रम लगानी गरेका छन् । यो एउटा करोडौं लगानी भएको क्षेत्र बनिसकेको छ । अब हाम्रो कदम राज्यको मुख्य तहमा आफ्नो कुरा पुर्याउने हो । यो संघर्षमा सामेल योद्धा रेखा थापालाई भोट गर्न मोरङ डिस्ट्रिक्टलाई आग्रह गर्दछु,’ करिश्माले लेखेकी छन् । 

उनले कलाकार र महिलाको हिसाबमा रेखालाई मतदान गर्न आह्वान गरेकी हुन् । स्थानीय तहको निर्वाचनअघि करिश्मा एमाले प्रवेश गरेकी हुन् । तर, एमालेले कुनै पनि जिम्मेवारी नदिएकाले उनी त्यसपछि निष्क्रिय जस्तै देखिएकी हुन् । चुनाव प्रचारप्रसारमा समेत त्यति सक्रिय छैनन् ।