काँग्रेस उम्मेदवारसँग चर्काचर्की गरेका प्रेम लगत्तै ढले

आगामी मंसिर १२ गते छोरीको विवाह भोजका लागि राँगोको छिनोफानो गरेर घर फर्केका चितवनका प्रेम श्रेष्ठ सँधैका लागि ढलेका छन् । मुग्लिनका प्रेम श्रेष्ठ गत आइतबार अपरान्ह घर आइपुगेर मोबाइलमा समाचार हेर्दै थिए ।

सोही दिन दिउँसो इच्छाकामना–४ लेवाटार, चितवनमा घरदैलो गरिरहेका उम्मेदवार रवि लामिछानेका समर्थक र सवारी साधनमाथि आक्रमण भएको थियो । उक्त आक्रमण सामाजिक सञ्जालमा छ्यापछ्याप्ती भइसकेको थियो । उनी त्यहि समाचार हेर्दै थिए ।

सोही समयमा चितवन–२ का काँग्रेसको तर्फबाट सत्ता गठबन्धनका उम्मेदवार उमेश श्रेष्ठ, प्रदेशका घनश्याम दाहाल उनीसँग भोट माग्न टुप्लुक्क आइपुगे । लामिछानेको गाडीमा भएको आक्रमणप्रति आक्रोशित काँग्रेस नेतृ निर्मला श्रेष्ठका पति प्रेमले काँग्रेस नेता सामु चर्को आक्रोश पोखे । 

मुग्लिनको देवकोटा मेडिकल हल नजिकै भएको काँग्रेस नेतासगँको भनाभनपछि एकाएक ढले । उनी कहिल्यै नउठने गरि ढलेको ढल्यै भएका हुन् । 

 
श्रीमती निर्मला २०७४ को स्थानीय तह निर्वाचनमा काँग्रेसको तर्फबाट इच्छाकामना गाउँपालिका–५ को महिला सदस्यमा विजयी भएकी हुन् । श्रीमान् ढलेको दिन पनि उनी गठबन्धनको प्रचाराम व्यस्त थिइन् । 

श्रीमतीसँग प्रेमले केही दिन अघिदेखि काँग्रेससहितको गठबन्धनलाई भोट नहाल्ने बताएको नातेदार तथा छिमेकीहरुले चर्चा गरेका छन् । ढलेका प्रेमलाई मुग्लिनमा रहेको हाईवे अस्पतालमा लगियो । त्यहाँ उपचार हुने कुरै थिएन । भरतपुर रिफर गरिएका प्रेमको सोही राति नै देहावसान भएको हो । भोलिपल्ट अन्त्येष्टि गरिएका श्रेष्ठको आत्माको चिरशान्तीको कामना गर्दै इच्छाकामना गाउँपालिकाले वक्तव्य नै जारी गरेको छ ।

अञ्जनकुमार