अनलाइन सट्टाबाजी खेलाउनेहरु पक्राउ

राजधानीका विभिन्न स्थानमा लुकिछिपि अनलाइन सट्टाबाजी कारोबारमा संलग्न दुई जना पक्राउ परेका छन् ।

प्रहरीको अपराध अनुसन्धान कार्यालयबाट खटिएको विशेष टोलीले निगरानी गर्ने क्रममा जमलबाट रुद्रप्रसाद पोखरेल र नरदेवीबाट पवन कुमार शर्मालाई पक्राउ गरिएको हो । पोखरेल हिजो र शर्मा आज प्रहरी नियन्त्रणमा पुगेका हुन् । 

हाल भइरहेको कतार विश्वकपका विभिन्न खेलमा अनलाइन सट्टाबाजी गराइरहेको अवस्थामा उनीहरुलाई फेला पारिएको प्रहरीले बताएको छ ।

पक्राउ परेकालाई मुलुकी अपराध संहिताको दफा १२५ को उपदफा ४ बमोजिम सट्टाबाजी गर्न गराउन नहुने कसुरअन्तर्गत थप अनुसन्धान एवम् कारबाहीको निम्ति जिल्ला प्रहरी परिसर, टेकू पठाइएको छ ।