भारतीय सैन्य टोली पोखरामा, उता पुगेका भारतीय राजदूत काठमाडौं फिर्ता

नेपाल भ्रमणमा रहेको भारतीय सेनाको उच्चस्तरीय टोली पोखरा पुगेको छ । भारतीय सेनाको आर्मी ट्रेनिङ कमाण्ड (आर्कट्रयाक) का प्रमुख लेफ्टिनेण्ट जनरल जेएस सन्धुको नेतृत्वमा आएको भारतीय टोली र नेपाली सैन्य अधिकृतहरुसहित १९ जनाको समूह आज पोखरा पुगेको छ । 

नेपाली सेनाको एनए–०६२ कासा जहाजबाट गएको टोली मध्यान्ह काठमाडौंबाट प्रस्थान गरेको थियो । यता, पोखरा भ्रमणमा रहनुभएका भारतीय राजदूत नवीन श्रीवास्तव आजै राजधानी फर्कनुभएको छ । उहाँ बुद्ध एअरको उडानमा दिउँसो पौने ३ बजे पोखराबाट काठमाडौं आउनुभएको हो । 

राजदूत श्रीवास्तव ससुराली खलकका केही सदस्यसहित पोखरा भ्रमणमा जानुभएको थियो । त्यसैगरी  नेपालका लागि संयुक्त अरब इमिरेट्सका राजदूत पनि आज पोखरा जानुभएको छ । राजदूत अब्दुल्लाह अल्साम्सी पौने ३ बजे बुद्ध एअरको उडानमा त्यसतर्फ जानुभएको काठमाडौंको आन्तरिक विमानस्थल कार्यालयस्थित बुद्ध एअर स्रोतले बताएको छ ।