आइजिपी विदेश उड्नुअघि बालुवाटारमा, फर्केपछि हैदरावादमा

प्रहरी महानिरीक्षक धिरजप्रताप सिंहले प्रधानमन्त्री पुष्पकमल दाहाल प्रचण्डसँग भेटवार्ता गर्नुभएको छ । उहाँ हिजो साँझ बालुवाटारमा प्रधानमन्त्रीसँग संक्षिप्त कुराकानी गर्न जानुभएको थियो । 

रवि लामिछाने पदमुक्त भएपछि अघिल्लो सातादेखि गृह मन्त्रालयको जिम्मेवारी पनि प्रधानमन्त्रीले नै सम्हाल्दै आउनुभएको छ । सोही क्रममा उहाँहरुबीच हिजो साँझ ८ बजे संक्षिप्त भेटवार्ता भएको हो ।

महानिरीक्षक सिंह भोलि बिहान विदेश यात्रामा जाँदै हुनुहुन्छ । उहाँ अन्तर्राष्ट्रिय अपराध प्रहरी संगठन (इन्टरपोल) को पर्सिदेखि बिहीबारसम्म अबुधाबीमा हुने एशिया क्षेत्रीय सम्मेलनमा भाग लिन जान लाग्नुभएको हो ।  

भोलि बिहान संयुक्त अरब इमिरेट्स (युएई) को राजधानी आबुधावी जाने कार्यक्रम रहेको उहाँको सचिवालयले जनाएको छ । अबुधाबीको भ्रमणपछि भारतको हैदरावाद जाने कार्यक्रम छ । 

हैदरावादस्थित नेशनल पुलिस एकेडेमीमा आयोजना हुने इण्डियन पुलिस सर्भिस (आइपीएस) अधिकृतहरुको दीक्षान्त समारोहमा सहभागी हुन उहाँ हैदराबाद जाने कार्यक्रम तय भइसकेको छ ।