नगरकोट र भक्तपुरमा सवारी दुर्घटना, दुईको मृत्यु

आज बिहान भएका दुई वटा सवारी दुर्घटनामा दुई जनाको निधन भएको छ । नगरकोटबाट भक्तपुरतर्फ आउँदै गरेको मोटरसाइकल र बनेपाबाट भक्तपुरतर्फ आउँदै  गरेको स्कुटर दुर्घटनामा परेको बताइएको छ ।

नगरकोटबाट भक्तपुरको तेलकोटतर्फ आउँदै गरेको प्रदेश ०३–०२–००९ प ५५०३ नम्बरको मोटरसाइकल चाँगुनारायण नगरपालिका–६, बाख्रीगाउँमा दुर्घटना हुँदा मोटरसाइकल चालकको निधन भएको छ । चालक शंखरापुर नगरपालिका–५, पालुवारीका ४० वर्षीय शंकर भ्लोन तामाङ हुन् । तामाङको सुष्मा मेमोरियल अस्पताल साँखुमा उपचारको क्रममा मृत्यु भएको प्रहरी परिसर भक्तपुरका प्रहरी निरीक्षक लोकबहादुर जिसीले बताए ।

उता बनेपाबाट भक्तपुरतर्फ आउँदै गरेको बा. ९९ प ३४८५ नम्बरको स्कुटी बा.४ ख ८९१२ नम्बरको बसमा ठोक्किँदा स्कुटर चालकको ज्यान गएको छ । धनकुटा खोलीखर्क गाउँपालिका–७ घर भई चाँगुनारायण नगरपालिका–२ झौखेल बस्ने ३९ वर्षीया ओमकुमारी श्रेष्ठको मृत्यु भएको बताइएको छ । उनको पनि उपचारकै क्रममा अस्पतालमा मृत्यु भएको प्रहरी निरीक्षक जिसीले बताए । तीन वटै सवारी साधन र बस चालक ४१ वर्षीय दयाराम देशेमरुलाई प्रहरीले नियन्त्रणमा लिएको छ ।