डिब्बावाला ट्रकमा डेढ क्विण्टलबढी गाँजा
मकवानपुरमा प्रहरीले डेढ क्विण्टलबढी गाँजा फेला पारेको छ । त्रिभुवन राजपथहुँदै पूर्व पश्चिम राजमार्गको मनहरी गाउँपालिका ९, ज्यामिरेमा पुगेर रोकिएको एउटा डिब्बावाला ट्रकबाट प्रहरीले उक्त परिमाणको गाँजा बरामद गरेको बताइएको छ ।
मनहरीस्थित सशस्त्र प्रहरी बल आईआरटी पोष्टको गस्ती टोलीले गएराति १ बजे डिब्बावाला गाडीमा गाँजा हालेर ल्याएको सुईंको पाएको हो । उक्त सुईंकोपछि सशस्त्र प्रहरीले इलाका प्रहरी कार्यालय मनहरीलाई खबर गरेको थियो ।
ट्रकमा १२ वटा पोकामा हालिएको गाँजाको कूल परिमाण १५८ किलोग्राम रहेको इलाका प्रहरी कार्यालय मनहरीका प्रहरी निरीक्षक कृष्णराज ढकालले बताए । त्रिभुवन राजपथ हुँदै गएको ना. ६ ख ४५२० नं को गाडीको क्याबिनमा गाँजा लुकाईछिपाई ओसारपसार भएको आशंका गरिएको थियो ।
गाँजासँगै ट्रकका सहचालक थाहा नगरपालिका ३, गोपाली गाउँ बस्ने विशाल गोपालीलाई प्रहरीले पक्रेर आवश्यक अनुसन्धान गरिरहेको जानकारी दिइएको छ ।
टिप्पणीहरू