सांसदहरुलाई रामचन्द्रको पत्र, श्रीमतीलाई उपप्रधानमन्त्री बनाउनुपर्ने रेशम चौधरीको माग

नेपाली काँग्रेसका वरिष्ठ नेता तथा राष्ट्रपति निर्वाचनमा उम्मेदवार रहेका रामचन्द्र पौडेलले सांसदहरुलाई व्यक्तिग सम्बोधनमा पत्र लेखेका छन् । फागुन २५ गते हुने निर्वाचनमा आफूलाई मतदान गर्न आग्रह गर्दै उनले सबै सांसदलाई पत्र पठाएका हुन् ।

राष्ट्रपति निर्वाचनमा प्रतिनिधि सभा, राष्ट्रिय सभा र प्रदेश सभाका सांसदहरु मतदाता रहने व्यवस्था छ । यसअघि उनले आफूलाई भोट दिन र दिलाउन सबैजसो राजनीतिक दलका नेतासँग भेटेर आग्रह गरिसकेका छन् । यसैबीच पौडेलले नागरिक उन्मुक्ति पार्टीका संरक्षक रेशम चौधरीसँग भेट गरेको बताइएको छ । हिजो चौधरीसँग भेट गर्न नेता पौडेल काठमाडौंको डिल्लीबजारस्थित सदर खोर पुगेका हुन् ।

भेटमा उनले उन्मुक्ति पार्टीका सबै सांसदलाई राष्ट्रपति निर्वाचनमा आफूलाई मतदान गराउने व्यवस्था मिलाइदिन आग्रह गरेको चौधरी निकट नेताहरुले बताए । तर जवाफमा चौधरीले आठदलीय गठबन्धनसँग उन्मुक्ति पार्टी अध्यक्ष तथा आफ्नी पत्नी रञ्जिता श्रेष्ठलाई उपप्रधान एवम् सहरी विकास मन्त्रालयको जिम्मेवारी दिनुपर्ने भन्दै पहिलो माग तेर्साएका छन् । 

चौधरीले पौडेललाई मत दिनुअघि काँग्रेसले संघीय सरकारमा अर्का एक जना सांसदलाई राज्यमन्त्री दिनुपर्ने, टीकापुरलाई कैलालीबाट छुट्टाएर अर्कै जिल्ला बनाउनुपर्ने, सुदूरपश्चिम प्रदेशको नामाकरण परिवर्तन गरेर खप्तड–थरुहट बनाउनुपर्ने र राजधानी धनगढी कायम गरिनुपर्ने मागलाई सम्बोधन गर्नुपर्ने माग पनि राखेका छन् ।