राष्ट्रपति निर्वाचनमा पराजित उम्मेदवारको खर्च जम्मा साढे १६ हजार

नौ दलको समर्थनमा उठेका काँग्रेसका रामचन्द्र पौडेलसँग राष्ट्रपति निर्वाचनमा पराजित एमाले उम्मेदवार सुवास नेम्वाङले चुनावी खर्च विवरण बुझाएका छन् । नेम्वाङका तर्फबाट एमाले सांसद महेश बर्तौलाले आज खर्च विवरण पेश गरेका हुन् । 

निर्वाचन अधिकृत महेश शर्मालाई बुझाइएको खर्च विवरणअनुसार नेम्वाङले निर्वाचनमा १६ हजार पाँच सय रुपैयाँ खर्च गरेको देखाइएको छ । उक्त रकममध्ये प्रचारप्रसार, छापा एवम् विद्युतीय शीर्षकअन्तर्गत मतदाताहरुलाई एसएमएस पठाउँदा १० हजार रुपैयाँ र मसलन्दमा छ हजार पाँच सय रुपैयाँ खर्च भएको उल्लेख छ । 

हिजो भएको राष्ट्रपति निर्वाचनमा काँग्रेससहित नौ दलका साझा उम्मेदवार पौडेलसँग नेम्वाङ पराजित भएका हुन् ।