दावी बिरोधको खण्डन गर्न जसपाका उम्मेदवार दलबलसहित बानेश्वर पुगे

उपराष्ट्रपति पदका उम्मेदवार रामसहाय प्रसाद यादव आफूविरुद्ध परेको उजुरीमा सफाई पेश गर्न निर्वाचन अधिकृतको कार्यालय पुगेका छन् ।

उजुरी खण्डन हुने सबुत प्रमाण लिएर उनी आज बिहान नयाँ बानेश्वरस्थित संघीय संसद भवनमा रहेको अधिकृतको कार्यालयमा छलफल गर्न गएका हुन् । पार्टीका सांसदद्वय प्रमिलाकुमारी यादव र प्रदिप यादवसहित अन्य नेताहरु लिएर संसद भवन पुगेका रामसहाय र निर्वाचन अधिकृतबीच उम्मेदवारीविरुद्ध परेको उजुरीका सम्बन्धमा शंकर हलमा छलफल भएको छ । 

 सत्ता गठबन्दनका उम्मेदवार रामसहायविरुद्ध नेकपा एमालेकी उम्मेदवार अष्टलक्ष्मी शाक्य र जनमत पार्टीकी उम्मेदवार ममता झाले उजुरी दिएका थिए । त्यसपछि निर्वाचन अधिकृतको कार्यालयले आज बिहान १० बजेसम्म उजुरी खण्डन हुने प्रमाण पेश गर्न भनेको थियो । 

उजुरी उपुर जाँचबुझ गरी आज मध्याह्न १२ बजेभित्र निर्णय गरिसक्ने र पाँच बजेभित्र उम्मेदवारको अन्तिम नामावली प्रकाशन गर्ने कार्यतालिका छ । आजै उम्मेदवारलाई आफ्नो उम्मदवारी फिर्ताको मौका पनि दिइएको छ । 

निर्वाचन आयोगले राष्ट्रपति र उपराष्ट्रपति फरक लिंगा वा समुदायको हुनुपर्ने  रहेकाले महिलाको मात्रै उम्मेदवारी दर्ता गर्ने निर्णय गरेको थियो । तर, सत्ता गठबन्धनले भने आयोगको निर्णय संविधान प्रतिकूल रहेको भन्दै रामसहायलाई उम्मेदवार बनाएका हुन् । गठबन्धनबाटै दुई जना महिलाको पनि उम्मेदवारी परेको छ । उनीहरुविरुद्ध भने उजुरी परेको छैन।