फौजदारी अभियोग लागेका व्यक्ति उम्मेदवार बनेपछि अस्कलमा तालाबन्दी

फौजदारी अभियोग लागेको व्यक्ति स्ववियु निर्वाचनमा उम्मेदवार बनेको आरोप लगाउँदै राजधानीको लैनचौरस्थित अमृत साइन्स क्याम्पस (अस्कल) मा तालाबन्दी गरिएको छ । 

काठमाडौं जिल्ला अदालतमा ज्यान मार्ने उद्योगअन्तर्गत फौजदारी कसूरमा मुद्दा चलिरहेको व्यक्ति उम्मेदवार बनेपछि त्यहाँ विवाद चर्किएको बताइन्छ ।    अखिल (क्रान्तिकारी), राष्ट्रिय प्रजातान्त्रिक विद्यार्थी संघ, अनेरास्ववियू र नेकपा (बहुमत) ले अभियोग लागेको उम्मेदवारको उम्मेदवारी खारेज नगरेसम्म ताला नखोल्ने अडान लिएको छ । 

अनेरास्ववियुबाट अध्यक्षका उम्मेदवार कमलराज जोशी, प्रत्यक्ष सदस्यका उम्मेदवार गोपालबहादुर शाही, समानुपातिकतर्फका सदस्य उम्मेदवार पंकज पाण्डे र दिनेश सिग्देलविरुद्ध फौजदारी अभियोग रहेको ती संगठनको भनाइ छ । त्यस्ता व्यक्ति उम्मेदवार बन्न नपाउने व्यवस्था हुँदाहुँदै पनि दाबी विरोध उजुरीउपर छानबिन नगरिएको उनीहरुको आरोप छ । 

‘काठमाडौं जिल्ला अदालतमा ज्यान मार्ने उद्योगअन्तर्गत फौजदारी कसूरमा मुद्दा चलिरहेको र नेपालको संविधानबमोजिम निर्वाचनको उम्मेदवार बन्न नपाउने स्पष्ट व्यवस्था हुँदाहुँदै हाम्रो दाबीविरोध उजुरी छानबिन नगरिएको र यथास्थितिमा नामावली प्रकाशित गरिएकोमा हाम्रो गम्भीर ध्यानाकर्षण भएको छ’, जारी विज्ञप्तिमा भनिएको छ ।