रोजगारी सिर्जना अनुकूलको नीति तर्जुमा गर्न शैक्षिक अगुवाहरुको सुझाव

ऋषि भट्टराई

बुटवलका शैक्षिक अगुवाहरुले रोजगारी सिर्जना अनुकूलको नीति तर्जुमा गर्न सरकारलाई सुझाव दिएका छन् ।

बुटवल उपमहानगरपालिकाले सेवाप्रवाह तथा विकासबारे आगामी रणनीति तय गर्न नगरभित्रका शैक्षिक अगुवाहरुसँग गरेको छलफलमा उक्त सुझाव प्राप्त भएको हो ।कार्यक्रममा बोल्दै क्याम्पस प्रमुख र अध्यक्षहरुले शिक्षण संस्थाहरु बेरोजगार उत्पादन गर्ने थलोका रुपमा परिचित हुने अवस्था आएको उल्लेख गरे ।त्यसतर्फ समयमै सोच विचार गर्न सुझाव दिइएको छ । संघ, प्रदेश र स्थानीय सरकारका क्षेत्राधिकारअनुसार रोजगार सिर्जना र आत्मनिर्भर अनुकूलको नीति र कार्यक्रम ल्याउनुपर्ने उनीहरुको सुझाव छ ।

विद्यार्थीहरु न्यूनतम तहको अध्ययन पूरा गर्न अध्ययन गरिरहेको उल्लेख गर्दै उनीहरुले भने, ‘विदेश जानेको संख्या दिनहुँ वृद्धि हुँदै गएको छ । सोही बमोजिमको नीति तथा कार्यक्रम ल्याउनेतर्फ गम्भीर हुनुपर्यो ।’ कार्यक्रममा सहभागी क्याम्पस प्रमुख तथा अध्यक्षहरुले संघीय सरकारले प्रदेश र स्थानीय सरकारमार्फत गर्नुपर्ने काममा अलमल भएकोतर्फ इंगित गरेका छन् । त्योसँगै अधिकार प्रयोगमा समेत चासो दिन सुझाव दिएका छन् । शैक्षिक क्षेत्रका दक्ष जनशक्ति विदेश पलायन भएकाले दक्ष जनशक्तिको अभाव भएकोतर्फ सरकारी निकायले चासो दिनुपर्ने बताएका छन् ।

कार्यक्रममा बोल्दै बुटवल उपमहानगरपालिकाका प्रमुख खेलराज पाण्डेयले शिक्षा क्षेत्रमा बुटवललाई अग्रणी बनाउन सार्वजनिक निजी क्षेत्रको भूमिका पनि उत्तिकै रहेको उल्लेख गरे । उनले बुटवल उपमहानगरपालिकाले समाधान गर्न सक्ने समस्या बुटवलबाटै समाधान गर्ने र अधिकारक्षेत्रबाहिरका समस्या संघ र प्रदेशमार्फत समाधान गर्ने प्रतिबद्धता जनाएका छन् । 

सुझाव संकलन कार्यक्रमअन्तर्गत पहिलो चरणको कार्यक्रमपछि दोश्रो चरण थालिने सामाजिक विकास महाशाखा प्रमुख तथा सूचना अधिकारी तुलसा अर्यालले बताइन् ।