एमाले नेता र काठमाडौँका मेयर भैरहवाबाट संगसंगै फिर्ता, एयरपोर्टमा चौधरीको भेट

काठमाडौँ महानगरपालिकाका मेयर बालेन्द्र (बालेन) शाह भैरहवाबाट काठमाडौं फर्किएका छन् । उनी हवाईमार्ग हुँदै आज बिहान काठमाडौँ उत्रिएका हुन् । 

बुद्ध एयरको उडानबाट आज बिहान १० बजे मेयर शाह काठमाडौँ ओर्लिएको त्रिभुवन अन्तराष्ट्रिय विमानस्थल अध्यागमन स्रोतले जानकारी दिएको छ । सोही उडानबाट एमाले उपमहासचिव प्रदिप ज्ञवाली पनि काठमाडौँ आएको बताइएको छ । 

त्यसअघि काठमाडौँ फर्किन लागेका मेयर शाह र नवलपरासी जान लागेका डलर अर्बपति भनेर चिनिने कांग्रेस नेता तथा सांसद बिनोद चौधरीबीच भैरहवा एयरपोर्टमा जम्काभेट भएको थियो । बालेन्द्रसँग हात मिलाइरहेको फोटो आफ्नो फेसबुकमा राखेर चौधरीले लेखेका छन्, 'काठमाडौँ महानगरका मेयर बालेन्द्र शाहजीसँग नवलपरासी जानेक्रममा भैरहवा विमानस्थलमा भेट भयो। हामी छिट्टै भेटेर महानगरसहित समग्र विकासका बारेमा छलफल गर्नेछौँ ।'