जिज्ञासा राख्दा जब मेयर जंगिए

पूर्वगृहमन्त्री तथा राष्ट्रिय स्वतन्त्र पार्टीका सभापति रवि लामिछानेको दोहोरो नागरिकता प्रकरणले मुलुकमा तहल्का नै मच्चिरहेकै बेला काभ्रेपलाञ्चोकको पाँचखाल नगरपालिकाका मेयर महेश खरेलको पनि दुईटा नागरिकता र राहदानी भएको चर्चा छ । 

कांग्रेसबाट २ चोटिसम्म मेयर बनेका उनी लामो समय अमेरिका बसेर फर्किएका हुन् । विद्यार्थी भिसामा गएर १४ वर्ष उतै बसेका उनको त्यहाँ आफ्नै व्यापार व्यवसाय थियो । समाजसेवाको हुटहुटीले मुलुक फर्किन बाध्य बनायो भन्दै नेपाल आउनेबित्तिकै जनप्रतिनिधि बन्ने तरखरमा लागेका उनले तलबभत्ता, सेवा–सुविधा केही पनि नलिने घोषणा गरेका थिए । उनीमाथि कैयौं पटक अरुलाई अवमूल्यन गरेको आरोप लागेको छ ।

पाँचखालको मेयर भए पनि अधिकांश समय काठमाडौंमै बस्ने उनको स्वभाव धेरै मतदातालाई मन पर्दैन । एमाले कार्यकर्ताहरूका अनुसार उनीसँग अझै अमेरिकाको ‘ग्रीनकार्ड’ छ । आफ्नो गल्ती नदेखाउन उनी भारत हुँदै अमेरिका जाने गरेको स्रोतको दाबी छ । 

यसबारे बुझ्न वेबसाइटमा रहेको फोन नम्बर ९८४३०४१७८८ मा सम्पर्क गर्दा उनले आफूले अमेरिकी नागरिकता नलिएको दाबी गरेका छन् । ‘मैले अहिलेसम्म अमेरिकी नागरिकता लिएकै छैन । जसले भनेको हो, त्यसैलाई गएर सोध्नु । सक्नुहुन्छ भने अदालतमा गएर मुद्दा हाल्न लगाउनु’, उनले आक्रोशित हुँदै जवाफ फर्काए र फोन काटिदिए ।