बैतडीमा जीप दुर्घटना : एकको मृत्यु, १४ घाइते

बैतडीमा भएको जीप दुर्घटनामा एक जनाको ज्यान गएको छ । दुर्घटनामा घाइते भएका १४ जनामध्ये दुई जना बालक रहेको बताइएको छ ।

पञ्चेश्वर गाउँपालिका ५, तिलकपुरमा आज बिहान भएको दुर्घटनामा स्थानीय ५५ वर्षीय महादेव भट्टको मृत्यु भएको हो । से. १ ज २९५ नम्बरको जीप दुर्घटनामा परेको जिल्ला प्रहरी कार्यालयले जनाएको छ । जीप सडकबाट झण्डै ७० मीटर तल खसेको छ ।

घाइतेहरुको जिल्ला अस्पतालमा उपचार भइरहेको छ । घाइतेमध्ये २३ वर्षीया कुन्ती भट्टको अवस्था गम्भीर छ । चालक राकेश कोली पनि घाइते भएका छन् ।