रवि लामिछानेलाई बुझाउन मार्सीसँग पैसा माग्ने ढाकालाई रास्वपाको पूर्जी

घुस प्रकरणमा जोडिएका सांसद ढाकाकुमार श्रेष्ठलाई राष्ट्रिय स्वतन्त्र पार्टी (रास्वपा) ले २४ घण्टे स्पष्टीकरण सोधेको छ । 

मेडिकल बिचौलिया दुर्गा प्रसाईंसँग दुई करोड मागेको अडियो बाहिरिएपछि रास्वपाले उनलाई निलम्बन गर्दै स्पष्टीकरण बुझाउन भनेको हो । अडियोको वास्तविकताबारे सत्यतथ्य छानबिन गर्न केन्द्रीय अनुशासन तथा आचरण समितिले २४ घण्टाभित्र स्पष्टीकरण पेश गर्न श्रेष्ठलाई निर्देशन दिइएको प्रवक्ता मुकुल ढकालले जानकारी दिए । 

सार्वजनिक भएको अडियोका सन्दर्भमा पार्टीको गम्भीर ध्यानाकर्षण भएको ढकालले बताएका छन् । यस सम्बन्धमा सत्यतथ्य छानबिन गरी तीन दिनभित्र केन्द्रिय समितिमा प्रतिवेदन पेश गर्न अनुशासन तथा आचरण समितिलाई निर्देशन दिइएको उनले बताए । 

छानबिन सम्पन्न नहुँदासम्मका लागि सांसद र पार्टीको साधारण सदस्यको हैसियतमा कुनै काम नगर्न, नगराउन रास्वपाले श्रेष्ठलाई पनि निर्देशन दिएको छ । 

आफू स्वास्थ्यमन्त्री बन्न र सोही क्रममा पार्टी (सभापति रवि लामिछाने) लाई बुझाउन दुई करोड रुपैयाँ चाहिएको भन्दै सांसद श्रेष्ठले प्रसाईंसँग पैसा मागेको अडियो आज बिहान सामाजिक सञ्जालमा भाइरल भएको छ ।