भन्सार छलिएको १२ लाखको कपडा बरामद, ल्याउने फरार

सशस्त्र प्रहरी बल नेपालले १२ लाख रुपैयाँ बराबरको अवैध कपडा बरामद गरेको छ । सिरहाको प्रमुख व्यापारिक नाका लाहानबाट आज बिहान ती कपडा बरामद गरिएको सशस्त्रको नम्बर ७ हेडक्वार्टरले जनाएको छ । 

हेडक्वार्टरका अनुसार सशस्त्र प्रहरी बल, नेपाल सुरक्षा बेस क्याम्प, लहानका सहायक प्रहरी नायव उपरीक्षक प्रमोदप्रसाद पाठकको कमाण्डमा खटिएको नौ जना र प्रस्तावित सीमा सुरक्षा गुल्म ईनर्वाबाट खटिएको दुई जनाको संयुक्त टोलीले भन्सार छलेर ल्याइएको कपडा नियन्त्रणमा लिएको हो । 

भारतबाट नेपालतर्फ आउँदै गरेको प्र.२–०१००१ख०२९८ नम्बरको सेतो मिनिट्रक चेकजाँच गर्दा कागजपत्र नभएको ठूलो परिमाणमा कपडा फेला परेको प्रहरीले जानकारी दिएको छ । सवारी चालक फरार छन् । १२ लाखको कपडा र २० लाखको मिनिट्रक गरी ३२ लाख रुपैयाँ मूल्याङ्कन गरेर सामान र सवारी साधनलाई भन्सार कार्यालयमा बुझाइएको छ ।