सार्वजनिक कार्यक्रममा महिलालाई ‘सेक्सी’ भनेपछि एमाले अध्यक्षलाई तनाव

पूर्वप्रधानमन्त्री तथा एमाले अध्यक्ष केपी शर्मा ओलीले सन्थाल समुदायका महिलाका बारेमा हालै दिएको यौटा अभिव्यक्ति विवादमा परेको छ । सन्थाल महिलाहरु 'बोल्ड' हुन्छन् भन्दै भाषण गरेपछि उहाँ विवादमा पर्नुभएको हो । 

ओलीको अभिव्यक्तिको विरोध गर्दै सन्थाल समुदायले सार्वजनिक रुपमा माफी माग्न चेतावनी दिएको छ । सन्थाल समुदायलाई सतार भन्दै ओलीले केही दिनअघि पत्रकार सम्मेलनमा सो समुदायका महिलाको पहिरनलाई लिएर एकदमै आपत्तिजनक अभिव्यक्ति दिनुभएको थियो । 

उहाँले भन्नुभएको थियो,‘हाम्रो गाउँका सतार महिलाहरुले जुन पहिरन लगाउनुहुन्छ,त्यो टिभीमा ल्याएर देखाइदिने हो भने वाहा ! बोल्ड सिन भनेर उधुम मच्चिन्छ । एउटा गम्छा यसो बाँधेको हुन्छ, माथि एउटा गाम्छा यसो हालेको हुन्छ । क्या बोल्ड सिनजस्तै देखिएको छ भन्ने हुन्छ ।’

सन्थाल समुदायले भने ओलीले आफूहरुको अपहेलना गरेको भन्दै उक्त अभिव्यक्ति फिर्ता लिन माग गरेको छ । सतार जातिलाई सन्थाल जाति बनाउनुपर्छ भनेर जिल्ला प्रशासन कार्यालय,मोरङ्गमा ज्ञापनपत्र बुझाइरहेको अवस्थामा पूर्व प्रधानमन्त्रीजस्तो जिम्मेवार पदमा पुगिसकेको व्यक्तिले हेपाहा प्रवृत्ति देखाएको उनीहरुको आरोप छ । 

सन्थाल समुदायको भोटबाट चुनाव जितेर प्रधानमन्त्री भएको व्यक्तिले सार्वजनिक कार्यक्रममा दिएको अपमानजनक अभिव्यक्ति दास मानसिकताको पराकाष्ठा भएको उनीहरुले बताएका छन् । आदिवासी समुदायलाई होच्याउने मनशाय राखेर ओलीले मनलाग्दी बोलेको आरोप लगाउँदै सार्वजनिक रुपमा पश्चाताप गर्न भनिएको छ । 

अन्तर्राष्ट्रिय सन्थाल परिषद्ले संस्थागत रुपमै ओलीको अभिव्यक्तिप्रति घोर निन्दा गरेको जनाएको छ । उहाँले नचाँहिदो अभिव्यक्ति दिएको परिषद्का उपाध्यक्ष मोहन टुडुको ठम्याइ छ । 

‘तपाईंलाई हामी पूर्वप्रधानमन्त्री भनेर सम्मान गर्छौं अनि झापाको शान ठान्थ्यौं । तर,आज तपाईंप्रति अनगिन्ती प्रश्नहरु खडा भएका छन्’,उनले अगाडि थपेका छन्,‘कि तपाईंको दिमागी हालत बिग्रिन थालेको छ ? त्यही भएर चाहिँदो नचाहिँदो कुरा गर्नुहुन्छ ।’