नौ पटक जिब्रो छेडेका बुद्धकृष्णले आराम गर्ने, छोरा सुजनले शुरु गर्ने

आज भक्तपुरको मध्यपुर थिमीस्थित बोडेमा जिब्रो छेड्ने जात्रा मनाइँदै छ । थिमीका २७ वर्षे सुजन बाग श्रेष्ठले जिब्रो छेड्ने बताइएको छ । 

सुजनका पिता बुद्धकृष्ण बाग श्रेष्ठले यसअघि नौ पटक जिब्रो छेडिसकेका छन् । थिमी नगरपालिका र मध्यपुर पर्यटन विकास समितिले जात्राको तालिका सार्वजनिक गरेका छन् । जसअनुसार जिब्रो छेड्ने जात्रा मध्यान्ह १२ बजे सुरु हुँदैछ । 

जिब्रो छेडेपछि आजै सुजनलाई महादीप बोकाएर नगर परिक्रमा गराईंदैछ । महालक्ष्मी मन्दिरमा पुगेर जिब्रोमा गाडिएको सुइरो झिकेपछि यो वर्षको जात्रा सम्पन्न हुन्छ । जिब्रो छेड्ने जात्रा पनि भक्तपुरको बिस्का जात्राकै एक भाग हो ।

दिइएको विवरणअनुसार हालसम्म बोडेका १२ जनाले विगत १०८ वर्षदेखि जिब्रो छेड्दै आएका छन् । यसबीचमा कसैले ३२ पटक र कसैले २२ पटकसम्म जिब्रो छेडाएका थिए ।

आजै बोडेमा सिन्दुर जात्रा पनि मनाइँदैछ । सिन्दूर जात्रा बिहानैदेखि खेल्न थालिएको छ ।