रातो मच्छिन्द्रनाथको जात्रा आजदेखि शुरु, रथयात्राको रुटमा पर्ने सडक बनाइदिन आग्रह

काठमाडौं उपत्यकामा मनाइने रातो मच्छिन्द्रनाथको जात्रा आजबाट शुरु हुँदैछ । वैशाख शुक्ल प्रतिपदाबाट शुरु हुने उपत्यकाकै सबैभन्दा लामो जात्रा आज साँझ रथारोहणसहित शुभारम्भ गरिने छ । 

आज बेलुका ५ बजे गुरुजु–जङ्गी पल्टन (नेपाली सेना) को तोप सलामीसहित रातो मच्छिन्द्रनाथ देवताको पूजा गरेर तःबहालदेखि पुल्चोकसम्म खटयात्रा गरी पौरणिक बाजागाजासहित रथारोहण गराउने कार्यक्रम रहेको छ । 

वर्षा र सहकालका देवताको रुपमा परिचित ऐतिहासिक एवं सांस्कृतिक रातो मच्छिन्द्रनाथको रथ आउँदो वैशाख ११ गतेबाट तान्ने साइत रहेको गुठी संस्थान, ललितपुरले जनाएको छ । मच्छिन्द्रनाथको दर्शन गर्दा सुःख, सुस्वास्थ्य, दीर्घायु तथा आर्थिक उन्नति हुने जनविश्वास छ । रातो मच्छिन्द्रनाथ हेर्नेको घुँइचो हुने भएकाले संस्थानले रथ यात्राको रुट तोकेको छ । 

११ गते पुल्चोकदेखि गाः बहालसम्म रथ यात्रा गरिनेछ । १२ गते गाःबहालदेखि मंगलबजार र १३ गते मंगलबजारदेखि पाटन सुन्धारासम्म रथ पुर्याइने छ । त्यहाँ दुई दिन रथ राखेर १५ गते चक्रवहिलसम्म यात्रा गर्ने कार्यक्रम रहेको संस्थानले जनाएको छ । १६ गते चक्रवहिलबाट रथ तानेर लगनखेल पुर्याइने बताइएको छ । 

संस्थानका अनुसार त्यसको भोलिपल्ट राति महाबली पर्व सञ्चालन गरिनेछ । त्यसपछि लगनखेलबाट नरिवल खसालेर स्थल देउलाटोसम्म पुर्याउने जनाइएको छ । त्योसंगै नरिवलजात्रा र देवाली पूजाको मिति तोक्ने तय भएको छ । देवालीकै दिन ज्योतिषले सोह्रखुट्टे पार्टीमा जावलाखेल रथ तान्ने साइत तोक्नेछन् । नरिवल जात्राको भोलिपल्ट बिहान महिलाहरुले रथ तानेर थटि र चारदोबाटोसम्म पुर्याउने छन् । 

त्यस्तै, जावलाखेल पुर्याउनुभन्दा एकदिन अघि भूजापर्व र नरिवल जात्रा पर्व सञ्चालन गरेर थटिबाट जावलाखेलसम्म रथ तानिनेछ । जावलाखेलमा रथ विराजमान गराइएको चौथों दिनमा भोटो देखाइनेछ ।

मितिले रथ यात्रा गराउने रुट हेरेर बाटोको आवश्यक मर्मत गरिदिन जिल्ला प्रशासन कार्यालय, ललितपुरसंग आग्रह गरेको छ ।