प्रधानमन्त्री भेटेका महावीरले आन्दोलन गर्ने, एक्लै भए पनि पलेटी कस्ने
राष्ट्रिय आविष्कार केन्द्रका अध्यक्ष एवम् अनुसन्धानकर्ता महावीर पुनले आन्दोलन घोषणा गरेका छन् ।
अनुसन्धान, नवप्रवर्तन तथा आविष्कारका क्षेत्रसँग सम्बन्धित विभिन्न माग राख्दै भोलिदेखि आन्दोलन गर्न लागिएको बताइएको छ ।
बिहान ९ बजेदेखि राजधानीको माइतीघर मण्डलामा आन्दोलन थालिने अध्यक्ष पुनले बताए । सरकारले नवप्रवर्तनको क्षेत्रलाई बेवास्ता गरेकाले आन्दोलन गर्न बाध्य भएको उनको गुनासो छ ।
‘भोलि बिहान ९ बजेदेखि आन्दोलन शुरु गर्छौंं । सहभागी हुन चाहनेहरु स्वःइच्छाले आउन सक्नुहुन्छ । कोही आएनन् भने म आफैं माइतीघरमा पलेटी कस्छु’, उनले भने, ‘हामीले विज्ञान र प्रविधिलाई उच्च प्राथमिकता दिन सरकारसँग पटकपटक आग्रह गरिसकेका छौं । बेवास्ता गरेपछि आन्दोलनको घोषणा गर्नुपरेको हो ।’
उनले आन्दोलनमा सहभागिता जनाउन चाहनेलाई आफैं प्लेकार्ड र ब्यानर लिएर आउन आह्वान गरेका छन् ।
आन्दोलनका लागि ‘अनुसन्धान, नवप्रवर्तन र आविष्कार कोष खडा गर’, ‘अनुसन्धान र नवप्रवर्तनको लागि हरेक वर्ष विकास बजेटको एक प्रतिशत रकम छुट्याउ’, ‘प्रतिभाशाली सन्ततिहरुलाई आवश्यक अनुसन्धान, नवप्रवर्तक र आविष्कार गर्न सहयोग गर’,‘अनुसन्धान, नवप्रवर्तन र आविष्कार प्रवद्र्धन, सञ्चालन तथा खरिद ऐन बनाउ’, ‘नवउद्यमीहरुलाई हतोत्साहित नगर’, लगायत नारा तय गरिएको छ ।
अध्यक्ष पुनले अस्ति प्रधानमन्त्री पुष्पकमल दाहाल (प्रचण्ड) लाई भेटेर नवप्रवर्तनको क्षेत्रलाई उच्च प्राथमिकता दिन आग्रह गरेका थिए ।
टिप्पणीहरू