एमाले अध्यक्षले फेक एकाउण्टको सहारा लिएको पूर्वराजाको सचिवालयको संकेत

पूर्वराजा ज्ञानेन्द्र शाहले कुनै पनि प्रकारका सामाजिक सञ्जाल सञ्चालन नगरेको उनको संवाद सचिवालयले जनाएको छ । 

आज सचिवालयले सूचना जारी गरेर पूर्वराजा शाह, उनकी पत्नी पूर्वरानी कोमल र बुहारी पूर्वयुवराज्ञी हिमानी शाहले सामाजिक सञ्जाल चलाउने नगरेको स्पष्ट पारेको हो ।  

एमाले अध्यक्ष केपी शर्मा ओलीले पूर्वराजा ज्ञानेन्द्रले आफ्नी बुहारीलाई अघि सारेर समाजिक सञ्जालमा आफूविरुद्ध लेखाएको आरोप लगाएको भोलिपल्टै त्यसको खण्डनमा सचिवालयले यस्तो सूचना दिएको हो । हिजोको घटनालाई उद्धृत नगरिएको उक्त सूचनामा यस्ता निराधार, कपोलकल्पित भ्रमजालबाट मुक्त रहन आग्रह गरिएको छ । 

हिजो इलामको एउटा कार्यक्रममा ओलीले झापामा आफूविरुद्ध भएको ‘आक्रमण’ लाई ‘जनताले ढुंगा हानेको’ भनि हिमानी शाहले ट्वीट गरेको भन्दै चर्को आक्रोश पोखेका थिए । त्यसक्रममा ओलीले पूर्वराजा ज्ञानेन्द्रले छोराबुहारीलाई अघि सारेर फुरफुर गरेको बताएका थिए ।

त्यसो त, पूर्वराजपरिवारका सदस्यहरुका नाममा खोलिएका फेसबुक, ट्वीटरमा लेखिएका विषय यसअघि पनि पटक–पटक विवादमा परेको थियो । खासगरी हिमानीको नाममा रहेको फेसबुक र ट्वीटरमा आउने टिप्पणी बढी आलोचित हुने गरेको छ । तथापि उक्त एकाउन्ट हिमानी शाहको नाममा खोलिएको फेक भन्ने पुष्टी भैसकेको छ । 

२३ मंसिर २०७८ मा पनि पूर्वराजा ज्ञानेन्द्रको सचिवालयले पूर्वराजा शाह, पूर्वरानी कोमल र पूर्वयुवराज्ञी हिमानीले सामाजिक सञ्जाल चलाउने नगरेको जानकारी गराएको थियो । आजको सूचनामा पनि सो कुरा स्मरण गराइएको छ ।