व्यक्ति हत्याका आरोपित एमाले संसद संसदीय समितिमा सिफारिस

कर्तव्य ज्यान मुद्दाका आरोपित, प्रहरीको फरार सूचीमा रहेका नेकपा एमालेका सांसद लक्ष्मी महतो कोइरी संसदीय समितिमा सिफारिस भएका छन् । एमालेले उनलाई संसदको उद्योग तथा वाणिज्य र श्रम तथा उपभोक्ता हित समितिमा सिफारिस गरेको हो । 

एमालेले संघीय संसद सचिवालयमा बुझाएको समितिमा रहने सांसदहरुको सूचीमा कोइरीसँगै सांसदहरु रघुवीर महासेठ, शान्ति चौधरी, अमृतादेवी अग्रहरी, हेमराज राई, लालप्रसाद साँवा, रामशंकर यादव र मंगलप्रसाद गुप्ताको नाम छ । 

महोत्तरी–१ बाट निर्वाचित कोइरी २०७२ सालमा भएको मधेश आन्दोलनका क्रममा सशस्त्र प्रहरी बलका असई थमन विक हत्याको घटनाका अभियुक्त हुन् । २०७७ सालमा जनकपुर उच्च अदालतले उनलाई पुर्पक्षका लागि जेल चलान गर्न आदेश दिएको थियो । तर, अदालतको आदेश अवज्ञा गरी भागेका उनी अभियोग बोकेरै चुनावमा उठेर महोत्तरी–१ बाट निर्वाचित भए । 

मङ्सिर ४ को निर्वाचनमा उम्मेदवारी मनोनयनको मुखैमा जसपा परित्याग गरी बलियो पार्टी एमालेमा छिरेर सांसद जितेका उनी त्यसैको बलमा सांसदको सपथ खान र प्रधानमन्त्रीलाई विश्वासको मत दिन संसद बैठकमा उपस्थित भएका थिए । चार तहको सुरक्षा घेरा छिचोलेर संसद बैठकमा पुगेका कोइरी प्रहरीको फरार सूचीमा छन् । 

कोइरी भगाएको आरोप लागिरहेका बेला एमालेले संसदको विषयगत समितिमा उनको नाम सिफारिस गरेको हो । 

कोइरीले हिजोमात्रै आफू अस्वस्थ भएको जानकारीसहितको पत्र संसद सचिवालयमा पठाएका थिए । लगातार १० वटा बैठकमा बिना सूचना अनुपस्थित हुँदा पद गुम्ने भएपछि पद जोगाउन उनले पत्र लेखेका हुन् । प्रतिनिधिसभा नियमावलीमा लगातार १० वटा बैठकमा नजाने सांसदलाई सभामुखले पदमुक्त गर्न सक्ने व्यवस्था छ ।