भोलि कीर्तिपुरमा क्रिकेट हेर्न पैसा नलाग्ने

वर्षाका कारण ‘रिजर्भ डे’ मा सरेको एसिसि प्रिमियर कपको फाइनल खेलका लागि दर्शकले त्रिभुवन विश्वविद्यालय क्रिकेट मैदानमा निःशुल्क प्रवेश पाउने भएका छन् । 

आज भएको नेपाल र युनाइटेड अरब इमिरेट्स (यूएई) बीचको फाइनल खेल वर्षाले बिथोलेपछि भोलिका लागि सारिएको छ । नेपाल क्रिकेट संघ (क्यान)ले आज टिकट काटेका दर्शकहरूले भोलि मैदानमा निःशुल्क प्रवेश पाउने जानकारी दिए ।

वर्षाले खेल रद्द हुनुअघि आज यूएईले २७.३ ओभरमा ९ विकेट गुमाएर १०६ रन बनाएको थियो । भोलि यही अवस्थाबाट बिहान ९ बजेदेखि खेल सुरु हुनेछ ।

भोलिको खेल पनि वर्षाले अवरुद्ध भए सुपर ओभर खेलाएर विजेता टुंगो लगाइनेछ । त्यो पनि सम्भव नभए आइसीसी विश्व वरीयतामा यूएईभन्दा अगाडि रहेको नेपाल विजेता घोषित हुँदै आगामी सेप्टेम्बरमा पाकिस्तानमा हुने एसिसि प्रतियोगिताका लागि छनोट हुनेछ ।