राति मलेसिया उड्ने सपना जब बिहानै खरानीमा फेरियो

मलेसिया जान सर्लाहीबाट नाइटबस चढेर आएका ३९ वर्षे किशोर आज बिहान काठमाडौं आइपुग्ने बित्तिक्कै बितेका छन् । बिहान ५ बजे कलंकी आइपुग्दा सिटमा अचेत फेला परेका उनको वीर अस्पतालमा उपचार क्रममा साढे ५ बजे निधन भएको हो ।

सर्लाहीको  पडोरिया घर भएका उनले लामो समयसम्म मलेसियामा काम गर्दै आएका थिए । तीन महिने बिदामा घर आएका उनी आज राति पौने ९ बजे मलेसिया फर्कंदै थिए ।   हिजो साँझ सर्लाहीबाट ना.७ ख २७७३ नम्बरको शिवपावर्तती रात्रिबस चढेका उनी कलंकीमा सबै यात्रु झरे पनि सिटमा सुतेको अवस्थामा फेला परेका थिए । अचेत अवस्थामा तत्काल  उपचारार्थ  वीर अस्पताल पठाइएको प्रहरीले जनाएको छ । 

प्रहरीले उक्त सवारी साधन र चालकलाई नियन्त्रणमा लिएर थप अनुसन्धान गरिरहेको छ । घटनास्थल कलंकीमा प्रहरीको छ जनाको टोलीले आवश्यक सोधखोजपछि किशोरलाई अस्पताल पठाएको थियो ।साथमा रहेको पासपोर्ट र कागजातको आधारमा आज राति मलेसिया उड्ने योजना रहेको देखिएको हो ।